كيف تسافر للخارج بعد قرار منع سفر الطلاب

كيف تسافر للخارج بعد قرار منع سفر الطلاب

كتب

Etch Faruq

بالنسبة للناس اللي بتجهز للسفر دلوقتي "للدراسة" وقابلت القرار بتاع الجيش بشأن تصريحات السفر 

---

القرار في الحقيقة ـ لو صحيح ـ مش هيبقا لذيذ خالص لسبب بسيط، أي حد في فترة التجنيد بتاعته بيبقا مأجل التجنيد لسبب الدراسة، وفي الحالة دي عشان يسافر دايماً بيبقا محتاج تصريح سفر. تصريح السفر دا بقا مكانش ينفع نطلعه غير في الأجازة، بيطلع بسهولة جداً وفي نفس اليوم بورقة اثبات القيد بس، وكان بيطلع أثناء الدراسة بصعوبة جداً..

--

الجديد بقا في القرار إن مبقاش مسموح بالسفر للطلبة ولا في الدراسة ولا في الأجازة، غير بالشروط اللي هما قايلنها في القرار، بيبقا فيه دايماً في كل القرارات دي استثناءات سواء بوسايط أو بإقرار على مسؤلية الطالب الشخصية أو غيره، ولكن في العموم يصعب السفر بتصريح السفر الطبيعي.

الكلمة اللي احنا معنيين بيها واللي استشفينا منها تغير الموضوع دا هي المتعلمة بالأصفر، وانها بعد ما كانت زمان "أثناء فترات الدراسة" أصبحت "أثناء العام"..

-----

ايه الحل بقا؟

--

الحل ببساطة للناس اللي مسافرة "للدراسة" بتلجأ لحل تاني، وهو تأجيل التجنيد للدراسة بالخارج عن طريق مكتب البعثات اللي في مجمع التحرير الدور السابع، واللي الأوراق المطلوبة عشان تقدم عليها في الصورة التانية لو بكالوريوس والتالتة لو ماستر ـ مصورهم بنفسي من أمام المكتب قبل سفري ـ. الموضوع دا رخم لسبب واحد بس هو إنك بتحتاج تجيب جواب فصل من الجامعة اللي انت مقيد فيها لو كنت عديت الاتنين وعشرين سنة، أما لو كنت أقل فممكن تمشي بشهادة الثانوية العامة من غير جواب الفصل زي ما مكتوب. الميزة في الخطوة دي انك بتطلع تصريح سفر لمدة سنة كاملة بتطلع وتخش مصر أثناءها براحتك خالص، عكس التصريح القديم مبتقدرش تطلع غير في الأجازات كما ذكر من قبل..

******

ـ الناس تلاحظ إن الكلام دا كله مبني على إن القرار صحيح ولكن هو ممكن ميكونش صحيح أساساً لأنه غير منطقي تماماً..

ـ الناس تلاحظ بردو إن أي واحد واخد إعفاء أو إعفاء مؤقت من الجيش ملوش دعوة بالكلام دا ويتنطط زي ماهو عاوز..

******

أنت كل اللي هتعمله باختصار إنك هتدور على جامعة، تشوف طالبة إيه وتعمله سواء شهادات لغة أو تحضير أوراق (ثانوية عامة وبيان درجات جامعة متوثقين)، وتبعتلها كل الأوراق دي بالطريقة اللي هيقولولك عليها (يا إما بالبريد أو بالسكانر والإيميل يا إما عن طريق uni-assist) ، هيردوا عليك بقبول (Acceptance). أول ما توصل للخطوة دي يبقا انت خلصت تمانين في المية من الرحلة، هيتبقالك انك تكلم السفارة على فودافون ـ قبل المعاد اللي انت عاوزه بشهرين ـ وتحدد معاد المقابلة، وتروح في المعاد بأوراقك كلها وحساب بنكك أو جواب الجهة المانحة أو ضمان مالي والـ Motivation Letter ويتعملك مقابلة سفارة، وبتستنى يردوا عليك بالتأشيرة في خلال شهرين، لما تجيلك بتحجز طيارة وتطلع تصريح الجيش وربنا بيكرمك وبتسافر.

الموضوع من أول ما ينط في دماغك لحد ما توصل ألمانيا، هتمشي خلاله في تلات مسارات متوازية ..

-----

1- مسار البحث والتخطيط ..

https://www.facebook.com/H.Mohmed/posts/10153195516114646

2- مسار المذاكرة والامتحانات ..

https://www.facebook.com/H.Mohmed/posts/10153195528134646

بوست عن التحضير لامتحان الـ IELTS :https://www.facebook.com/H.Mohmed/posts/10153195530279646

3- مسار الأوراق والإجراءات ..

https://www.facebook.com/H.Mohmed/posts/10153195715204646

الموضوع من أوله لآخره لا يتطلب غير أربع مهارات ـ غير إصرارك وإرادتك ورغبتك الحقيقية في الموضوع وإيمانك بيه ـ ..

-----

ـ مهارة التخطيط

ـ مهارة البحث

ـ مهارة المراسلات

ـ مهارة الـ Self Study

لو أي مهارة من الأربعة مش عندك، سهل جداً تكتسبهم بسؤال الناس ـ والحفركة ـ والسؤال على النت، بس من الآخر هم دول اللي بيخلوا ناس تسافر وناس لأ ..

________________________________

ملحوظات مهمة لازم تتقري :

-----

* أخطر حاجة في الموضوع دا هو الوقت، لأنك دايماً مربوط بـ Deadlines تقديمات في الـ Semester سواء Winter أو Summer ـ ودا بيبقا نادر شوية ـ .

* موضوع إنك تتأخر سنة، ولا تبتدي من الأول، ولا تتأخر سنتين .. كل الحاجات دي شيلها من دماغك وتوكل على الله، تبتدي دلوقتي وتتأخر أحسن ما متبتديش خالص وتفضل تضيع وقتك في حاجة كلنا مقتنعين إنها ملهاش لازمة ـ التعليم المصري ـ 

* لو قررت تسافر يبقا متحصرش نفسك في ألمانيا، دور في كل دول العالم اللي فيها تعليم مجاني ـ أو حتى مش مجاني لو هتستلف عشان تتعلم استلف ـ ومعظم دول الاتحاد الأوروبي تعليمهم مجاني. فلتجد طريقك للبحث عن دولة تلمك 

ودا بوست بيتكلم عن خطوات السفر لماليزيا :

https://www.facebook.com/Abdallah.s.Moh/posts/10205542443774647

* لو مشيت في السكة، وعملت كل اللي عليك ومدخرتش ذرة مجهود، وبعد كل دا ربنا ما أرادش ومسافرتش. عادي خالص طالما استخرت يبقا إرادة ربنا هي الخير ومتعرفش كان ممكن يحصلك إيه هناك وربنا صده عنك.

_____

ـ متتسرعش وتسأل سؤال غير أما تتأكد إن إجابته مش موجودة في البوست، لأن كل التجارب اللي سمعتها كتبتها، وكل الخوازيق اللي ظهرت أدامي أو غيري كتبتها .. ولكن لا مانع من السؤال وأسعد بالاجابة عليه.

ـ أي خطأ تلاحظه في البوست أو أي معلومة ناقصة أو أي إضافة أو فيدباك، أسعد بنصيحتك لي لأن بالطبع عمل إنساني هيكون ينقصه الكثير، نكمله بنقدكم.

ـ السرية مهمة جداً في الخطوات دي كلها لو ناوي فعلاً تنجز حاجة، اشتغل مع نفسك واشتغل في صمت، وفي نفس الوقت اللي هيحتاج مساعدة هتساعده، واللي بعديك لازم تنقلهم كل خبرتك بالتفصيل وتفيدهم، هتاخد ثواب كبير على فكرة.

ـ الاستخارة في الموضوع دا مهمة جداً، كل فترة وقبل كل خطوة.

ـ النية .. لازم تظبط نيتك وسبب هجرتك إذا كانت لله ولرسوله ولا لدنيا تصيبها ؟ طلب العلم فريضة على كل مسلم والدين الإسلامي معلي جداً من شأن طالب العلم. فاقرأ في هذا الباب وتهيأ له.

****************************************

ـ بالنسبة لأي حد مش واخد سنة في جامعة مصرية، هيلاقي حالته مردود عليها في بوست المسار الأول "مسار البحث والتخطيط" ، سواء لو معهد صنايع أو ثانوية عامة أو غيره.

ـ بالنسبة للتكاليف والفلوس والقصص دي، الرد بالتفصيل في المسار التالت "مسار الأوراق والإجراءات.

ـ الناس تقرأ قبل ما تسأل، البوست فعلاً مغطي كل الأسئلة اللي اتسألتلي أو سألتها أنا شخصياً أثناء بحثي، السؤال أنا مرحب بيه تماماً ولكن بعد قراءة البوست بكل فروعه كويس، والبوست منظم يعني مش هيلخبطك وممكن تاخده مرجع لحد ما توصل ألمانيا.

- عملت تحديث في كل بوست إني حطيت محتواه في بدايته، ولذلك ممكن لو بتدور على حاجة معينة تعدي سريعاً على بوست كل مسار تقرأ المحتوى اللي في الأول وهتلاقي الحاجة اللي انت بتدور عليها.