اليوم هاكلمكم عن مصيبة اسمها credit card سواء كان فيزا او ماستر فبمجرد ان يعمل احدكم بمكان ويفتح حساب بالبنك لتلقى الراتب يجد عرض من البنك او المندوبين بكلام معسول عن ضرورة ان يكون معك كريدت كارد لتسهيل مدفوعاتك ومشترياتك ومش هاتدفع بس غير ٥% شهريا وهايكون الحد بتاعك ٣ مرات ضعف راتبك فانت طبعا كانسان مستهلك هاتفرح وتقول تمام اهو يفك زنقة لما المرتب يخلص او اشترى بية حاجة والمطاعم وكدة وبيتفشخر ويفتح البطاقة ويدفع بالكريدت زى رجال الاعمال والافلام الاجنبية وهوا مايعرفش الكمين الى منتظرة وهايظل معاة سنين طويلة وهايكون ازعاج يومى لاينتهى من تليفون التحصيل.
بص ياسيدى انت هايكون عندك حد ائتمانى مشتريات وحد ائتمانى نقدية وافترض ان حدك هايكون ١٠ الاف جنية منهم ٣ الاف نقدى و٧ الاف مشتريات وعندك ورق هاتوقعة الورق دة طلب بطاقة ائتمان ومش هاتعرف تقراة كلة لانة زى بوالص التامين مليان نقاط صغيرة عاوزة محامى بس ملخصها ان هاتتحبس لو مادفعت.
عندك رسوم اصدار اول مرة
عندك رسوم سنوية للبطاقة
رسوم اصدار بطاقة لو ضاعت
رسوم بريد
فايدة شهرية بين ١.٥% الى ٣% حسب البنك ( شهرية ) خد بالك مش بيقولك سنوى علشان ماتتخض فتشوف ١.٥ تقول يابلاش بس دى هاتبقى ٤٠% بمرور الشهور يامعلم بالسنة.
تاخد الكارت زى الباشا وتفعلة وتسحب الف اتزنقت لها ( اة عندك رسم سحب كاش دة لوحدة على كل عملية ) واشتريت هدوم واتشيكت ب٥ الاف مثلا وكام قهوة بستاركس على ملاهى للعيال هوب هاتلاقى البطاقة خلصت هايجيلك الفاتورة بعد ٣٠ يوم من اول استخدام ومطلوب تدفع ٥% يعنى انت صرفت ١٠ الاف وهاتدفع ٥٠٠ بس يابلاش .
طيب فين المشكلة؟
- هايجيلك الفاتورة اول مرة بها سحب كاش كذا مشتربات كذا فى مكان كذا لتاريخ كذا وبعدهم رسوم سحب الكاش وبعدهم الفايدة ٢% مثلا خلال الشهر دة ومطلوب تدفع ٥٠٠ بس مش موضح لك ال٥٠٠ دول اية فيهم قسط رسوم فلو فصصتهم هاتلاقيهم معظمهم رسوم بس ومبلغ صغير قسط.
تقوم زى الباشا تدفع ٥٠٠ الشهر الى بعدة تستهلك اخر الفين فيها وهاتيجى الفاتورة برضة بس هايحسبلك فايدة عن المبلغ الاولانى الى مش مدفوع شهر كمان والمبلغ الجديد شهر جديد وهاتلاقى الدين بيكبر والمبلغ الى هاتدفعة برضة ٥٠٠ او ٦٠٠ وتظل بالدوامة دى لغاية ماتلاقى نفسك خلصت البطاقة وعمال تدفع كل شهر وملتزم بش المبلغ مش بينقص بل ممكن يزيد لان الفايدة خلال سنة عالمبلغ اضرب ٢% فى ١٢ شهر يبقى ٢٤% يعنى ٢٥٠٠ فوايد على ال١٠ الاف وضيف الرسوم وغرامات تاخير السداد وخلافة عمالة شغالة فتقوم تلاقى بنك تانى يعرض عليك بطاقة تانية او نفس البنك يبعتلك انت راجل سكرة وهانزود لك الحد ٢٠ الف جنية الاجمالى فتفرح وتجرى تجيب للمدام هدية وترخص العربية وتخلص شوية سفاسف الامور ودة ماشى لكن الى ماتعرفوش ان المبلغ دة هاتفضل تدفع فية طول عمرك ومش هاينقص علشان هما مصممينة على كدة لو بتدفع الحد الادنى بس لكن لو حبيت تخلص ممكن تدفع نص المبلغ مرة واحدة وهايقل طبعا.
لكن هاترجع تانى تستخدمة وخد بالك السنة الى بعدها هايفضل يحسب الفايدة على المبلغ الاجمالى يعنى في فايدة انت مادفعتها بالقسط الحد الادنى بينزل علية فايدة برضة يعنى توصل كدة ماكسمان على ٤٠ % فايدة فى حين انك لو خدت قرض كاش بتكون فايدتة ثابتة طول عمر القرض فارجوك امشى على قدك.
والبنك الى بيحبك ويقولك عزيزى العميل لو مادفعت شهرين بتوع التحصيل هايكلموك وممكن يجيب سيرة امك وابوك لان هما مدربين على كدة للاسف ودى طريقتهم الوسخة وبيتفاخرو بيها امام بعض يقولك اما هزقت الراجل ومسحت بية الارض والشاطر الى يخليك تدفع بسرعة ولو عوقت يبعت الورق للمحامى علشان يسجنك.
ياحضرة العميل المحترم وتدفع مصاريف المحامى كمان ولو راتبك بيتحول عالبنك هايخصم فلوسة قبل ماتسحب راتبك كمان فبلاش وريحو حالكم وامشو على قدكم واشترو راحة بالكم وبلاش بهدلة انا عارف ان فى ناس مزنوقين بسمش افضل طريقة تفك بيها زنقة اعمل جمعية استلف من صاحبك او جارك اعمل قرض كاش حتى.
بس ارجوك بلاش كريدت كارد غير لو عاوزة بس كوسيلة دفع سهلة يبقى سدد اول باول بمجرد ماتيجى الفاتورة او سيب تعليمات مستديمة بحسابك الجارى بخصم كامل قيمة فاتورة الكريدت كارد رقم كذا وخلى صورة التعليمات معاك والله من وراء القصد كفانا واياكم شر ذل الدين فهو مذلة بالنهار وهم بالليل.
طبعا الفايدة والتسهيلات بتختلف من بنك لبنك ومن بلد لبلد بس انا شرحت الكونسبت الاساسى وامريكا تقريبا اجمالى ديون الكريدت كارد تبلغ على ماقريت ترليونات دولار بس امريكا واوربا غيرك يامسكين ياساكن العالم الثالث لان بامريكا والدول المتقدمة لايجوز حبس المدين بناء على علاقة تعاقدية.
يعنى هناك لو توقفت عن الدفع ماتتحبس لكن يحجز على مرتبك او معاشك بقيمة القسط او حتى يحجز على بيتك وعربيتك وهدومك بس مافيش حبس لكن بلادنا المتخلفة لاتطبق هذا القانون بالرغم من انة من حقوق الانسان الى مصر وقعت عليها عام ٦٧ تقريبا ويفوق القوانين المحلية لكن مصر لاتطبقة وهاتتحبس لو الف جنية او تدفع بالتى هى احسن.
فى معلومة ناقصة ان المبلغ الى مش مسدد دة فية جزء فايدة بيتحسب عليها فايدة تانى الشهر الى بعدة وهكذا يعنى بتدفع فايدة على الفايدة وفايدة على اصل المبلغ المسحوب نقدى او مشتريات.
كتب : راجى وخلاص
0 تعليقات