كيف تجمع البيتكوين بين فوائد الدفع كاش أو الدفع الرقمي
حضرتك بتحب تدفع كاش ولا ديجيتال ؟؟
كلمتين يبانوا عكس بعض , لأن مترسخ في ذهننا ان الكاش يعني الفلوس الورق , أما الديجيتال فهي الفلوس اللي بنستخدمها عشان ندفع بالفيزا أو أونلاين.
طيب لو فكرنا ايه هي مميزات الكاش ؟
- الكاش فوري و نهائي التسوية يعني لما تاخد ورقة فلوس من حد مقابل خدمة كده خلاص محدش يقدر ياخدها منك تاني , مش مستني سيستم يأكد أو يسمع .
- الكاش مفيهوش أي رسوم تحويل زي الطرق التانية الديجيتال , ماستركارد مثلا بتاخد 3 % علي كل حاجة بتشتريها أونلاين
- الكاش أنت فقط اللي متحكم فيه مش معتمد علي أي وسيط ممكن يعطلك زي البنك و أعتقد ناس كتير اتعرضت لمواقف بايخة تبقي مش عارفة تحول فلوسها لبلد معينة أو بطاقتها مقفولة أو غيره كتير .
- الكاش كمان في خصوصية كويسة أنك مش مضطر تكشف عن هويتك و أنت بتدفع , عكس الدفع الديجيتال كل حاجة متسجلة باسم عند البنك.
طيب ايه هي الميزات بقا اللي في الديجيتال ؟
-الدفع عبر المسافات و الحدود , يعني أنت مصر تقدر في 5 دقايق تدفع فلوس ل شركة نتفليكس في أمريكا عشان تشترك , مش محتاج تسافر تديهم كاش !
- الديجيتال أكثر أمانا من الكاش , لأن الكاش لو اتسرق منك محدش يقدر يعملك حاجة خلاص , لكن كارت الفيزا لو اتسرق منك ممكن تتصل بالبنك توقفه .
- الديجيتال كمان بيوفر كتير في الفكة و الكسور , لكن الكاش اللي دايما محتاج تطرح و تجمع و تدورعلي فكة مناسبة للرقم اللي هتدفعه بالظبط .
- الديجيتال كمان غير قابل للإتلاف , لكن الورق الكاش ممكن يتبل أو يتحرق أو يتقطع .
الابتكار و العبقرية الحقيقية في البيتكوين يظهر في أنه عملت اللي كنا متخيلين في يوم انه مستحيل , و جمع الحلو من هنا علي الحلو من هنا. البتكوين فيه مميزات الكاش من غير عيوبه و في نفس الوقت في مميزات الديجيتال من غير عيوبه !
عشان كده اتسمي البتكوين بالديجيتال كاش Digital Cash
0 تعليقات