التصوير مش حاجة سهلة زي ما اغلب الناس متوقعين , التصوير علم و له اساسيات ..العلم دا لو معاك انتا هتعرف تصور كويس و هتعرف تعمل كل اللي نفسك فيه .
المهم : ايه المطلوب منك عشان تخش في الكارير الجميل دا ؟
1 - تتعلم اساسيات التصوير زي فتحة العدسة و سرعة الشاتر و الايزو و نقط الفوكاس و حاجات كتير كدا هتلاقيها في أي كورس ع اليوتيوب .
2 - تتعلم ايه صيغ الصور اللي موجودة , و انك تعمل لوجو كويس و تعرف الفرق ما بين ال Jpeg و ال Png .. تعرف يعني ايه بيكسل و يعني ايه Resolution ..
3 - تتعلم ازاي تصور مانيوال بالكاميرا !!!!!! و دي اهم حاجة في الليلة كلها اصلا .
مينفعش تكون شاري كاميرا بمبلغ و قدره و تسيبها هيا اللي تفكرلك في الاعدادات و تزبطلك كل حاجة .. صدقني الكاميرات لو سبتها تفكر هتلاقيها غبيه و بتعك الدنيا .. حتى الكاميرات اللي بتوصل ل 20 ألف جنية و انتا طالع .. كلهم أغبياء والله . .. هيا امكانياتها كويسة بس مخها غبي .
مينفعش اطلاقا تصورو ع الاوتو . كل حاجة في الكاميرا لازم تعرف ازاي تتحكم فيها و تعرف وظيفتها ايه .
من الاخر كدا خليك انتا المخ و خلي الكاميرا هيا العضلات .
4- تتقن كويس جداً برنامج Adobe Lightroom ..
ده كورس هيوفر عليك كتير
مش هتحتاج الفوتوشوب اوي في البداية غير انك تعمل منه لوجو او تزبط بيه حاجات بسيطة , لكن اللايت روم اهم بكتير و هيفيدك في التعامل مع عدد كبير من الصور و يوفرك وقت .
مفيش حاجة اسمها انا مش هعمل تعديل للصور و هسيبها بطبيعتها و تقول انك كدا مصور كويس و طبيعي .. لأ
احنا في زمن التكنولوجيا دلوقتي و كل حاجة متطورة و كل الصور اللي بتشوفها متعدل عليها تعديلات بالعبيط .. تقسيمة الصورة الناجحة من وجهة نظري الشخصية :
40% توزيع اضاءة مزبوط + 30% معدات كويسة + 30% ايديت .
لو انتا مش بتعرف تعمل ايديت اعرف ان 30% من جمال صورك طار .. دا باعتبار انك معاك معدات كويسة و موزع الاضاءة صح . و دا مبيحصلش .
اللي مش بيعمل ايديت دا زي واحد مثلا بيسافر راكب جمل عشان شايف ان دا الطبيعي اللي ربنا خلقه و العربيات حاجة وحشة مضرة بالبيئة .
5 - صوّر كتير اوي و انزل في كل حتة و خلي الناس تعرفك .. انا 95% من الشغل اللي جالي معارف .. في مصورين كتير ع الفيسبوك و انتا مش احسن واحد فيهم , فا اللي هيجيب مصور من الفيسبوك غالباً هيجيب مصور احسن منك :
6 - التعليم كويس و جميل .. بس التطبيق الكتير أهم .. امشي في السكتين بالتوازي ..
والله 80% من المصورين اللي شوفتهم كل اللي بيعملوه انهم بيطبقو مش بيتعلمو .. هوا اه معاه الاساسيات و بيعرف يصور كويس بس مش متعمق في العلم , هتحس بقيمة العلم دا لما يحصل حاجة غلط و تصلحها , حتى لو مصلحتهاش ع الاقل هتعرف سببها ايه و تبعد عنه . لكن هوا بالنسبالو السبب مجهول .
7- الكاميرا الغالية مش هيا اللي هتطلعلك صور كويسة .. لو اشتريت بوتاجاز غالي هيطبخ اكل حلو ؟؟
ده مقال هيعلمك تبقى مصور محترف باقل الامكانيات
اما بقى لوعايز تبيع صورك استفيد من القال ده على قد ماتقدر
http://bit.ly/2NYu3Ir
by : Noura Bassem
0 تعليقات