و انت طالع علي شرم او نويبع او دهب اتحرك ساعة او ساعتين بدري و روح لمالديف مصر الي ممكن تعمل فيه استشفاء بالمايه الكبريتية السخنة و مش هتدفع فيه جنية.
المياه الكبريتية - راس سدر - سيناء
22 كيلو من راس سدر حوالي 8 كيلو منهم مدقات بس مش رخمة علي العربيات:
- المكان مساحته صغيرة جدا زي حمامات السباحة بالظبط.
- منبع الماية بيطلع مايه بتغلي درجة حرارتها 200 درجة و الهواء هو الي بيبردها عقبال اما توصل للبحيرات دي.
- فيه تلات بحيرات الماية بتصب فيهم و بتبقي درجة حرارة المايه عند المصب عالية جدا و يفضل انك متنزلش المايه غير لما تبرد درجة حرارة البحيرة الي هتنزل فيها و من الناحية البعيدة عن المصب.
- الماية بتبرد عن طريق سد المجري المائي ليها بالظلط الكبير عند منبع الماية و تحويلها للبحيرة التانية.
- متنزلش الماية اكتر من نص ساعة متصله و يفضل تعمل ماسك طينة علي المفاصل.
- الماية كبريتية و بيقال انها مفيدة للعضم و للجلد و درجة حرارتها صعبة لازم تتبرد .
- المايه درجة حرارتها خطر جدا علي الاطفال عشان المجري المائي منتشر في كل حتة لحد المصب و ممكن الاطفال تقع في الماية الي درجة حرارتها عالية جدا بتطلع بخار مايه من الحرارة.
الطريق : ليها مدخلين علي الطريق الرئيسي و انت جاي من القاهرة بعد راس سدر.
اول مدخل بيبدأ بكمين جيش و لما تسيب الاسفلت المدق فيه وحش جدا ومليان تريلات و هتعدي علي كماين و نقطتين تفتيش.
تاني داخلة علي الطريق هي دي الي ممهدة الي حد ما و الاسفلت مكمل معاك لحد الاخر بس متاكل فممكن نعتبرها مدق عربيات بس سهل المشي فيه.
سافروا جوا مصر و حافظوا علي نظافة المكان الي رايحينوا .
و ممكن تروحوا حمام فرعون بعدها ب 50 كيلو تقريبا و فيها مدق بردو (: و انتوا راجعين ممكن تعدوا علي عيون موسي في طريق الرجوع بردوا و لما اروح هصور الاماكن دي هي كمان ان شاء الله.
و ده اللوكيشن بتاع المياه الكبريتيه للي حابب يروح
ملحوظة علشان الناس اللي مستغربة من درجة الحرارة انها 200 درجة و انها مايه .. السوائل لما بتبقي تحت ضغط بيرتفع درجة غليانها و كل ما الضغط زاد تزيد درجة غليانها .
زي حلة الضغط الي بتسوي اللحمة في ساعة بينما في المايه المغليه ممكن تقعد 3 او 4 ساعات لان ذرجة حرارة المايه في حلة الضغط كبير جدا جدا فبتوصل ل 116 درجة في الحلة و هنا الضغط خرافي فلما قاسوا درجة الحرارة لقوها كدة.
كتب: احمد حسن
0 تعليقات