كمية شكاوى كتير جدا بشوفها يوميا من صفحات بيع اونلاين على فيسبوك وانستجرام.. يا جماعة ثقافة التسوق اونلاين عندنا في مصر ملهاش ضابط ولا رقيب, كل واحد يروح يشتري شوية حاجات صيني درجة ١٤ رديئة ويعمل صفحة في ثانية الا ربع واعلان ممول في ٣ ثواني ويبقى اسمه اونلاين ستور.
ومهما نصب على الناس يقدر يعمل بلوك لكل كومنت سلبي ويعمل شوية ريفيوهات وهمية على كام ١٠٠ الف لايكس وهمية برده ومحدش هيعرف انه نصاب , وحتى لو صفحته اتقفلت هيعمل صفحة تانية باسم تاني ويكمل بيع عادي جدا.
كده العيب مش عليه بصراحة العيب على كل واحد يوافق انه يدفع فلوس في منتج من صفحة مجهولة ولا ليها مقر يقدر يرجعله ولا حد هيقدر يعمله حاجة
وده بيخلي اصحاب النفوس الضعيفة تعمل اللي هي عايزاه وتقبل على نفسها فلوس حرام لان من امن العقاب اساء الادب
طب ايه الحل؟ نبطل نشتري اونلاين؟
لا طبعا لان الاونلاين ستورز دي هي المستقبل وشوف مواقع زي امازون مثلا صاحبها اغنى رجل في العالم والموقع ميزانيته ميزانية دولة كاملة
بس لازم يكون في ضوابط للموضوع في ظل غياب الرقابة , اذا كيف اعرف ان الموقع أو صفحة فيسبوك أو انستجرام موثوق للشراء ؟
١. متستلمش اي منتج وتدفع فلوسه غير لما تفتحه وتجربه بنفسك الاول وتتأكد انه مطابق للوصف وشغال بكفاءة ومنتج اصلي مش تقليد ولو مندوب شركة الشحن قالك مينفعش قوله خده رجعه لصاحبه وتكون متفق من البداية مع البائع على كده
٢. متشتريش من صفحة معليهاش ريفيوهات وتشوف الريفيوهات الاول تتأكد انها مش مضروبة وهتعرف تفرق كويس بين المضروب والصحيح لما تقراه بنفسك
٣. متشتريش منتج تقليد وترجع تشتكي ولو منتج صاحبه بيدعي انه اصلي ولقيت سعره اقل من الطبيعي بكتير يبقى مش اصلي خاصة البرفانات والساعات والنضارات دي اكتر حاجات بتتضرب
٤. حاول تتعامل مع مواقع معروفة زي سوق وجوميا ونون وغيرهم علشان تضمن ان المنتج حتى لو استلمته سليم وباظ خلال ٣٠ يوم تقدر ترجعه وعارف ان المواقع دي احيانا في منها شكاوى بس مش ده الغالب دي بتبقى حالات فردية وهتاخد حقك في النهاية لانها بتخضع لرقابة جهاز حماية المستهلك
٥. لازم تستلم فاتورة مع المنتج فيها التاريخ والسعر والمواصفات علشان تقدر ترجع بيها على البائع لو لقيت فيها مشكلة
٦. متسترخصش في اللي بتشتريه وتدور دايما على الارخص بغض النظر عن مصدره لان النصاب لازمله طماع والمنتج الاصلي هيعمر معاك اكتر من التقليد فلو حسبتها من الناحية دي هتلاقيه ارخص واكثر امانا عليك وعلى صحتك
٧. لو اتضحك عليك في منتج متستعوضش ربنا وتسكت لان عليك مسئولية مجتمعية انك تشهر بصاحبه وتحذر الناس منه علشان محدش يقع في الفخ زيك
لو كلنا نشرنا الوعي ده النصابين دول هيختفوا ومش هيبقى ليهم مكان وسط الناس المحترمة اللي بتحاول تكسب بالحلال ولكن معندهمش القدرة المادية لفتح محلات ودفع ايجارات والتجارة الالكترونية لو انتشرت هتعود على الجميع بالمكسب لان البائع هيكسب وفي نفس الوقت هيقلل تكلفة المنتج على المشتري لانه وفر تكاليف ايجارات ومصاريف تشغيل اصحاب المحلات بيحملوها على العميل وبيبيعوا المنتج غالي علشان يكسبوا ويعوضوا مصاريف التشغيل دي كلها.
كتب : محمد وجيه
0 تعليقات