التسويق الشبكي أكبر خدعة للإحتيال في العالم

كتب: Tawfiq Mahmoud

انا مش هقعد أشرحلك واحكيلك إنه كُل طرق الاستثمار المبنية على "مخطط بونزي" اللي هو انت تعرفه بأسم التسويق الشبكي، بتكون في الأخر خدعة لجذب المستثمرين الطموحين بوعوود عائد كبير وسريع عن طريق جذب مستثمرين آخرين في حين إنه محدش بيكسب غير الراس الكبيرة اللي فوق فقط والباقيين بيحتالوا على معارفهم لتعويض خسارتهم..

إنت حتى لو سرشت على اسمه عربي او انجليزي في اي حته، هيطلعلك معناه "وسيلة إحتيال عن طريق الاستثمار.".. هو طلع في فترة وانتشر ولما بدأت تظهر قضايا عالمية للإحتيال والسرقة عن طريق الموضوع دا، بدأ يخفت نجمه تاني بس المشكلة بتاعه أكبر من كده لإنه انت بتبدي بجذب القريبين منك الأول، فلما بيدركوا إنه الموضوع نصب ومفيش عائد زي ماتوعدوا، بتخسر علاقتك بيهم. وخد بالك دا مش في مصر بس، دا حوالين العالم لانه الخدعة او الاحتيال فيه جزء نفسي وهو اللعب على مشاعر المقربين.

المهم أنا مش هحكيلك تفاصيل أكتر من كده، بس هحكيلك قصة أكبر واحد استفاد من الموضوع دا في العالم وبقى اكبر محتال في التاريخ..

الامريكي Bernard Madoff كان عايز في الستينات يخش مجال البورصة ويشوف أكل عيشه وسط الكبار كده، فعمله شركة بسيطة ب5000 دولار كده، والراجل كان وشه حلو وبيفهم، وفضل يعلى يعلى يعلى لغاية ما بقى رئيس او مدير النسداك NASDAQ (تاني اكبر سوق بورصة مالي في العالم ولأول إلكترونيًا) مدرك إنت يعني ايه من شركة بـ5000 دولار، لكونه رئيس اكبر سوق مالي في العالم!

المهم إنه بيرنارد طلع في دماغه فكرة استخدام مخطط بوزني والتسويق الشبكي بقى.. هو راجل عملي وذكي وناجح جدا جدا وسمعته أغلى م الجنية الدهب وكل معارفه مليارديرات مش مليونيرات حتى.. بدأ يشتغل على معارفه الكبار.. الكبار أوي اوي وكان عددهم حوالي 4500 مستثمر تقريبًا جابوا بعض بالطريقة اللي انت عارفها، والربح بيتحط في جيبه في الاخر زي مانت عارف طبعًا لغاية ماتقبض عليه في 2008 واكتشفوا نصبه واتحاكم بشوية جرايم اطول منك كده.

بيرنارد قعد حوالي 15 سنة يعمل مخطط بوزني دا، قدر في الفترة دي يكسب بالاحتيال 75 مليار دولار. إيه!! وحياة امك وامي كسب بالتسويق الشبكي والاحتيال عال4500 ملياردير دول حوالي 75 مليار دولار ودول في 2008 كفيلين يخلوه اغنى راجل في العالم.

بيرنارد اتحكم عليه ب150 سنة حبس، وغرامة 150 مليار دولار والتحفظ على كل ما يملك هو وزوجته، ولغاية دلوقت لسه في الحبس وهو عنده 80 سنة.

اتعمل عن قصته السنة اللي فاتت فيلم اسمه The Wizard of Lies وقايم بدوره، الممثل العظيم روبرت دي نيرو.. أنصحكم تتفرجوا عليه وش يعني.

روح يمين وشمال وشرق وغرب، قصص النصب بالتسويق الشبكي مالية العالم، بس على ما يبدوا انه الاغبياء والجهلة اكتر.. وبيبقى عارف وخايف يواجه نفسه ومعارفه وقرايبه.