كيفية اختيار نيتش مربح لموقعك الجديد

كتب : Alim Mohamed

النهاردة بتكلم عن اختيار نيتش مربح طبعا الكلام ده للي لسه هيبدا بس كمان مفيد لو حد بدا بالفعل و حابب يشتغل صح

انا هبدأ بالعكس وهقولك علي نيتشات لا تعمل عليها في المحتوي العربي.

1-الصحة:

من حوالي سنة ونصف جوجل ركزت مع المحتوي الصحي من ناحية البحث ومن ناحية ادسنس واي حد عنده موقع صحي عارف الكلام ده وحضرتك جرب تبحث عن علاج مرض معين هتلاقي الصفحة الاولي معظمها مواقع طبية شهيرة علي عكس زمان

واخلاقيا الموضوع اصلا مش كويس يعني ايه انا اطلب من حد خريج تجارة مقاله بعنوان "علاج تليف الكبد " واكتب شوية اعراض لاداعي للخوف منها وتطلع خطيرة للاسف الطبي مينفعش فيه الا الدكتور بلاش هبد طبي ارجوكم

2-المحتوي المثير

طبعا مش بتكلم عن الاباحي انا بتكلم عن المحتوي اللي بنعمله بحجة انه صحة جنسية ومعظم اللي بيدخولة مراهقين او محتوي الموضة اللي قلب ملابس داخليه مثيرة المحتوي ده كان سيء جدا وللاسف اي حد بيعمل موقع نسائي بيضطر يشتغله لانه بيلاقي اعلي المقالات من المحتوي ده وفي النهاية جوجل ركزت مع المحتوي ده وحظرت صفحات كثير من ادسنس وعطلت مواقع كثيرة بنفس السبب فبلاش محتوي مثير ياريت

3-فكر خارج المطبخ

طبعا كلنا عارفين عبارة "فكر خارج الصندوق" انا بقولك فكر خارج المطبخ ليه بقي لان 90% حرفيا من قنوات اليوتيوب ومواقع كثيرة عربية مختصة بالمطبخ ... هبسطهالك اعمل موقع او قناة طبخ لو انت شيف

ولو هتقدر تشغل شف في الموقع او القناة مثلا بحيث يقدر يبتكر حاجة جديدة ويرد علي الاستفسارات اوك

4-اطفال

محتوي الاطفال انا من فترة وعارف انه هيحصل معاه مصيبة بسبب قضايا متعلقة بتوجية اعلانات للاطفال وسحب بيانات الاطفال وتوجيه محتوي واعلانات كبار لهم الخ ومؤخرا جوجل ادسنس اعلنت انها ستقيد الاعلانات علي كل قنوات الاطفال في 1-2020 لنفس السبب وبالتالي المحتوي الموجه للاطفال سواء هادف او غير هادف بلاش منه حاليا الا ااذ كان هدفك غير ربحي او هتسوق لمنتج خارج ادسنس

5-اخبار

طبعا في ناس كثير بتفكر تعمل موقع اخبار وهنا بتحصل مشاكل كثيرة اهمها انك مش هتقدر تنافس وكالات الانباء الضخمة وطبعا الاخبار بتعتمد علي السبق وعلي الاستمرارية وعلي حجم الصيحفة او الموقع وللاسف انت كموقع صغير مش هتقدر تنافس ده غير الدخول في مشاكل سياسية لو حابب تشتغل اخبار يبقي نيتش صغير من الاخبار زي " اخبار نادي الزمالك مثلا " هتعرف تظبط مصادرك كويس ويبقي ليك السبق وتنزل اخبار مفصلة وتحافظ علي مشتركين عائدين بشكل مميز

6-موقع عام

طبعا كلنا انبهرنا بمواقع عامة زي موضوع وحبينا نقلد نفس الفكرة علي اعتبار اننا هنتصدر زيه طبعا الفكرة ليك انت كشخص شغال وحدة او شغال مع 2 او حتي 3 في الموقع مش هتنفع ده غير ان المواقع العامة مستقبلا مش هتنافس مع المواقع المتخصصة والعقل يقول انك تفهم في تخصص محدد وتشتغل عليه صح وتبني جمهور كويس والناس تشترك وتبقي زوار عائدين افضل

7-الدين

طبعا هتستغرب لو قلت لك بلاش تعمل موقع ديني او قناة اسلامية ليه ؟؟ لان معظم الاعلانات اللي هتظهر علي المحتوي الديني غير مناسبة ليه وانت لو هدفك ربحي من المحتوي الديني انصحك بلاش وشوف لك محتوي تاني

ولو هدفك غير ربحي انصحك تدعم مواقع اسلامية ضخمة قائمة بالفعل عن طريق التبرع او حتي التسويق لها او التطوع فيها او التصميم لها الخ

في واحد بيقول انت كده قفلتها ومفيش نيتشات تاني !!! طبعا في كتير بس احنا بنفكر في الاسهل مش الافضل بنفكر في العادي مش المبتكر

دي قائمة بـ 20 فكرة مواقع انا لو هابدا في اي مشروع قريب هيكون واحد منهم

1- موقع او قناة عن الدراجات الهوائية "هتستهدف ناس راقية وتنشر انواع الدرجات وكيفية الاختيار واخبار مسابقات الدرجات وروابط مباشرة لشراء الدرجات ومستلزماتها "

2- موقع او قناة عن تربية طيور الزينة "هتستعين بحد خبير في تربية الطيور او لو انت بتحب المجال ده هتقرا كويس عنه وتشوف فيديوهات كتير ومجال حلو والزوار كلهم هيشتركوا عندك وهيبقوا زوار متكررين بسهوله وهتقدر تسوق للطيور وادواتها واكلاتهم وتقدر تعمل محتوي عن انواعها واكلاتها واخبار عنها الخ والطبقة اللي بتربي طيور عالية

3- موقع او قناة عن الموتوسيكلات وانواعها واخبارها وتحديث دوري باسعارها واماكن البيع واكسسوارات وطبعا الطبقة دي شباب واشباح بمعني اصح تخيل الناس دي بتتابع صور موتوسيكلات يوميا

4- موقع او قناة عن اسعار منتجات البناء وما يتعلق بها واللي سعرها بيتغير محدث يوميا "الحديد-الخشب بانوعه -الاسمنت-الطوب-السيراميك - ادوات السباكة -الحديد الخردة" مع مقالات ونصائح متعلقة بالبناء ومشاكله

5- موقع او قناة عن "اعلانات وزارة الاسكان " سواء اراضي او شقق ويبقي فيه بالتفصيل كيفية الحجز وتفاصيل الحجز ونصائح وشرح بالفيديو والسماح للزوار بالاشتراك لمتابعة جديد الاعلانات

6- موقع مختص يقوم صاحبة بتجربة قوالب ووردبريس مدفوعة وكذلك اضافات عديدة ومن ثم اختيار الافضل ثم عمل ريفيو كامل لها ورابط مباشر للشراء

7- موقع او قناة مختصة بالاجهزة المنزلية وريفيوهات مع الاستعانة بمعارض والتصوير بها ونصائح لاختيار الافضل ونصائح للمحافظة علي الاجهزة الخ

8-موقع او قناة مختص بالمصنوعات اليدوية هتعمل اعلان ممول تجميع الناس اللي بتعمل اشغال يدوية وتعرض شغلهم علي الموقع وتاخد نسبة من المبيعات ومع الوقت هيبقي منصة للمصنوعات اليدوية

9- موقع او قناة عن زراعة الاسطح والادوات المستخدمة مع الاستعانة بخبير

10- موقع عن الخدمات المنزلية زي "نقل العفش-ابادة الحشرات-تسليك البلاعات" طبعا النيتش ده كل اللي شغالين فيه شركات ومعظم شغلهم شمال الشمال وبيستهدفوا الخليج انت هيبقي شغلك انك هتبقي بمثابة دليل للخدمات دي وهتبقي الصعوبة في البداية في بناء مشتركين عندك بعد كده هتطلب من الشركات دي الاعلان عندك ولو مجانا واعلانات ادسنس في النيتش ده غالية

11- موقع مختص بمراكز الصيانة لكل الشركات وكيفية التواصل معها ونصائح خبراء وعمل مقالات حول مراكز الصيانة لكل محافظة

12- موقع او قناة مختصة بالانتي فيرس وريفيوهات ومقارنات مستمرة وعروض شهر بشهر وطبعا هتستهدف الناس اللي بتشتري والشركات

13- موقع مختص بالانتيكات والمقتنيات القديمة وعشاق جمعها وصور لها واخبار عنها وعرض مقتنيات منها من مواقع زي سوق وجوميا وامازون للبيع افليت

14- موقع او قناة مختصة بنوع سيارات معين وكل السيارات اللي انتجتها الشركة دي واخر اخبارها وفروعها وعروضها ومراكز صيانتها وريفيوهات لكل السيارات الجديدة التابعة لها انا قلت نوع محدد بس لان النيتش كبير جدا جدا

15- موقع مختص بالوفيات هيبقي برمجي شوية هيسمح للزائر بادخال بيانات المتوفي ليعرض له تصميم منسق يقدر ينشرة علي الفيس بوك فيه تعزية سواء كان صاحب العزاء او حد بيعزي بس الموقع ده مش هينفع طبعا يكون ربحي

16- الموقع فكرتة انك هتقعد مع نفسك هتختار 50 نيتش و50 دومين ليهم مميز و 50 قالب مناسب ومحتوي تاسيس و صفحة فيس وتويتر وانستجرام وتستهدف النيتشات الخاصة بالبيزنس وانواعه وتبدا تعرض المواقع دي للبيع جاهزة لاي شركة حابة تبدا

17- قناة خاصة بتعليم صنعة وهتستعين بصنايعية تشرح

الفكرة حلوة خصوصا لو قدرت تلاقي ناس كبيرة في السن ومتفرغة ممكن تشرح لك اصول الصنعة

18- موقع مختص بكل وسائل الدفع من "بايبال - بايونير - فوري- فودافون كاش-بطاقات الدفع الخ " واخبارها وشروحات خاصة بيها وكيفية الحصول عليها وكمان شراء رصيد من وسطاء تابعين للموقع

19- موقع او قناة مختصة بالكورسات الاونلاين ويتم تقسيمة الي كورسات لغة كورسات حاسب كورسات تنمية بشرية الخ وقسم خاص بالكوسات ذات الشهادات المعتمدة وتحديث مستمر للكورسات

20-قناة مختصة بالسفر الي بلد معين وتستعين بحد هناك يصور ويشرح بالتفصيل ازاي تسافر هناك سواء للعمل او السياحة وعادات وتقاليد البلد ونصائح وتحذيرات الخ