الفرق بين الـ Content و الـ Context و الـ Engagement

الفرق بين الـ Content و الـ Context و الـ Engagement

كتب : Mohamed Ashrf

قاعد في الميكروباص في أمان الله، حاطط سماعتك في ودانك ودافع اجرتك فكة عشان تريح دماغك من لم الاجرة والباقي وفجأة "بدلي الجنيية داا يسطاااا"، طبعًا هتتجاهل الموضوع عشان انت برنس في نفسك وترجع لأغنيتك وسرحانك تاني بس للاسف المرادي "مااله الجنيه يا استااااذ"، ف خلاص بتستسلم وتسمع الحوار الممتع بتاعهم واللي بيخلص ان الجنيه مقطوع والبيه عامل ازعاج للعربية كلها عشان مياخدوش.

آسف اني فكرتك بالمواقف دي بس فعلا ليه الناس بترفض تاخد فلوس مقطعة؟ ما الجنيه دا فلوس وليه قمته، ليه يترفض؟

الاجابة لانه مقطوع او لانه قيمة بتتقدم بطريقة غير مناسبة ليها، حتى لو كانت 100 جنيه كان الراكب هيعترض ويقوله هات مية جديدة، الفلوس دي مش هعرف اصرفها.

نفس الكلام ينطبق على كتابة المحتوى، انت ممكن يكون عندك content مفيش اخوه بس قدمته في صورة مش مناسبة خلت الناس ترفضه، انت اشتغلت content صح بس نسيت ال context و ال engagement، ف تعالى نتكلم عنهم شوية.

في البداية ما هو الـ content في عالم الـ marketing؟ هو مصطلح قديم شوية بس ظهر بقوة مع ظهور ال digital marketing وال inbound methodology وباختصار هو اي محتوى بقدمه للجمهور بتاعي بهدف الترويج للشركة او المنتج سواء كان المحتوى دا تعليمي او تفاعلي او اي نوع من الانواع الكتيرة بتاعته

دلوقتي لو انت عملت content قوي جدا بس معرفتش تقدمه هل حد هيقبل بيه؟ (قبل ما تجاوب فكر كام مرة اترفضت في شغل بسبب انك عارف المعلومة بس مش عارف تعبر عنها) عشان كدا ظهر معانا حاجة اسمها context وهي الطريقة اللي بقدم بيها المحتوى للناس وفيها حاجات كتير زي

ال tone of voice تخيل كدا بتنصح حد وانت متعصب!!

ال type of content يعني مثلا مش هينفع تكلم حد عن تيشرتات من غير صور حتى لو عندك افضل طريقة لصنع التيشرتات في البيت بدون روت، ولا هينقع تقنع حد بكورس بصور بس من غير كلام يشرح محتوى الكورس حتى لو الصور دي بافضل كاميرا في العالم.

المكان والوقت اللي هتعرض فيه ال content، اكيد انت عارف اني مينفعش اطلع لايف اعلم الناس كتابة المحتوى الساعة 2 بعد نص الليل على انستجرام، بس هينفع عادي الساعة 6 المغرب على الفيسبوك او الافضل منهم فيديو يوتيوب.

انت هتتكلم عن ال content ازاي؟ يعني لو عندك فيديو يوتيوب عن SEO تفضل لما تنشر اللينك بتاعه على الفيسبوك تكتب "ال SEO كما لم تره من قبل" ولا تكتب " 6 مواقع هيساعدوك تتعلم SEO بشكل اسرع ".

تعالى ندخل بقى في الـ engagement وليه اصلًا؟

الـ engagement هنا مش زي مانت فاهم انه تفاعل الناس معاك بعد نشر المحتوى، لا هو تفاعلك انت معاهم قبل نشره، بمعنى انك بتتعامل معاهم كواحد صاحبهم وعارف طريقتهم ولا انت غريب عنهم، ولو شايف الموضوع ملهوش لازمة فافتكر في ابتدائي حبيت كام مادة بسبب ان المدرس بتاعها كان طيب و بيفهمك بالطريقة المناسبة ليك؟ فكر بقى العميل بتاعك هيحبك ازاي لو اتكلمت معاه باسلوبه وطريقته؟ مثلا لو قولت لأم 7 نصايح للعناية بابنها وقت الدراسة افضل ولا انك تقولها معلومات علمية اثبتت كيف يمكننا تطوير العقل البشري!!!

عشان مطولش عليك في النهاية انت ك inbound marketer او content creator بتتعامل مع بشر ومحتاج تعرف هما حابين يعرفوا ايه منك ويعرفوه اازاي وبطريقتهم.

اتمنى انك تكون عرفت الفرق بين الcontent وهي الحاجة اللي بقدمها للناس وال context وهي الطريقة المناسبة اللي بقدم بيها الحاجة دي، وان ال engagement مهم عشان ابني علاقة قوية مع العملاء بتوعي.