الإستعداد و تجهيز التقديم لولاية كوينزلاند
أولا الشروط العامة:
لازم تتأكد من مجموع نقاطك كويس و أنك محقق كل شروط إدرة الهجرة DHA من حيث اللغة و المعادلة بتاعتك جاهزة و إن معاك كل الأوراق اللي تثبت الخبرة اللي إنت طالب تاخد عليها نقط.
ثانيا الشروط الخاصة بالولاية:
كوينزلاند بيكون ليها شرط القدرة المالية (حنتكلم عليه) و شرط التسجيل في هيئة خاصة بالولاية لبعض المهن و البعض الأخر لا.
مثال: لو انت مهندس و معادل شهادتك مع EA هتحتاج تتسجل في بورد المهندسين الخاص بالولاية قبل ما تاخد أي إجراءات للتقديم علي الولاية.
بينما لو أنت معادل شهادتك مدير مشروع CPM مفيش أي شرط للإلتحاق بهيئة معينه و ممكن تقدم للولاية مباشرة. ده لينك لأنواع الفيزا في الولاية
ثالثا تجهيز الأوراق:
الأوراق المطلوب تجهيزها للولاية هي كالتي:
1- State Nomination Application
ده الابليكيشن الاساسية اللي بتملاها و تمضيها و تبعتها و ده نموذج ليها (للتعرف عليه و تجهيزه فقط لكن لما يجيلك انفيتيشن الولاية بتبعتلك كل الملفات اللي مفروض تملاها يعني مش حتستخدم ده)
2- Settlement Fund Declaration Form
ملف بي دي اف لتوضيح الضمان المالي (بتكتب المبلغ الكاش اللي معاك و اي املاك او اشياء اخري و القيمة التقديرية ليها) و ده نموذج له
3- Bank Balance/Statement
بيان رصيد من البنك او كشف حساب يوضح الضمان المالي (الكاش فقط)
و ده لينك المبلغ المطلوب حسب عدد افراد الاسرة
4- Commitment to Qld
مقالة بتتكتب بتوضح مدي جدية و التزام المتقدم بمكوثه في كوينزلاند و أسباب
اختياره ليها و يفضل متنقلهاش من حاجة علي النت او تجيب مواضيع عامة عشان دي تقريبا اكتر حاجة بتهمهم و لو مش مكتوبه كويس و حسوا انها موضوع انشا و مش بتعبر عن اسبابك الحقيقية و التزامك تجاه كوينزلاند ممكن يبعتولك تعدلها و تبعتها تاني (حصل معايا)
في اللينك ده بيشرحوا تعليمات بخصوص طريقة كتابة الكومتمنت
و ده نموذج للإطلاع فقط لتوضيح فكرة و شكل Commitment
5- Skill Assessment
اثبات معادلة الشهادة
6-Statement of Service
شهادات الخبرة من الشركات
7- Evidence of Registeration
اثبات التسجيل في جهة معينه خاصة بالوظيفة (زي البورد للمهندسين)
ده الرابط الرسمي اللي عليه كل الاوراق المطلوب تحضيرها تحت فيه حاجة اسمها
Document Check list
رابعا EOI :
اول ما الولاية تفتح ان شاء الله بتتأكد من وجود مهنتك علي قوائم الولاية QSOL
سواء كنت بتقدم علي فيزا 190 أو فيزا 489 حسب مجموع نقاطك و بتروح علي موقع HomeAffairs تعمل EOI جديدة و تختار نوع فيزا واحد بس و تختار الولاية كوينزلاند مش الكل و تحاول تعمل الكلام ده بسرعة خلال ساعات اعلان الولاية انها فتحت.
خامسا الحصول علي دعوة من الولاية لتقديم أبليكيشن:
الولاية بتراجع علي EOI اللي اتقدمت و بتبتدي تبعت دعوات للتقديم (كان السنة اللي فاتت بأولوية التقديم منعرفش السنة دي حيتغير ولا لا) و بعد كدة بيجيبكلك إيميل بيقول إن الولاية بتدعوك تقدم أبليكيشن كامل بالأوراق و الرسوم المطلوبة (حوالي 200 دولار استرالي) خلال 14 يوم.
سادسا تقديم ابليكيشن الترشيح:
في المرحلة دي بتقدم الابليكيشن بتاعك (عن طريق بورتال خاص بيهم بيبعتولك اللينك و كل الملفات اللي عايزينك تملاها) عشان يتراجع و طبعا لازم تتاكد انك رافع كل الورق و مش ناسي حاجة و لو كله تمام بتجيلك دعوة للتقديم علي الفيزا نفسها مع إدارة الهجرة (هنا الولاية دورها إنتهي)
خامسا التقديم لإدارة الهجرة LODGE :
دي check list للأوراق المطلوبة للتقديم علي الفيزا و حتساعدكم علي تجهيز الورق المطلوب من بدري عشان متنسوش حاجة.
و ده لينك لفيديوهات دكتور نادر الشهابي اللي هي افضل شرح لتقديم ابليكيشن الفيزا علي موقع ادارة الهجرة.
بالتوفيق للجميع إن شاء الله.
0 تعليقات