افضل مواقع استضافة المسافرين مجانا

افضل مواقع استضافة المسافرين مجانا

كتب

‎Ahmed Mohamed‎   

موقع Couchsurfing بيخليك تلاقي ناس من اهل البلد اللي انت رايحها تستضيفك ببلاش عدد ايام معينه سواء يوم او اتنين او حتي 10 .. حسب كل هوست بالاتفاق معاه .. وبيوفرولك اما كنبه أو سرير ف اوضه أو اوضه كامله حسب كل هوست

هتدخل الموقع وهتعمل اكونت وتنزل معلومات بسيطه عنك وصوره ليك وكله ببلاش .. وفيه اوبشن انك تدفع اشتراك سنوي 60 دولار عشان يعمل vertified للأكونت وبالتالي بيكون موثوق اكثر عند الهوست انك شخص جاد وكدة و كمان بيديك عدد غير محدود من الاضافات

.

طيب هو ايه الاستفادة اللي هيستفيدها الهوست ؟؟ بينيمك عنده ليه مجانا ؟؟

1- في ناس بتبقي مهتمه بالتعرف علي الثقافات المختلفه وتكوين اصدقاء من كل دول العالم

2- في ناس تانيه بتستعمله من مبدأ " قدم السبت تلاقي الخميس والجمعه بليل "

انه لما يستضيف ناس كتير مجانا ويقرر يروح دول غاليه جدا في المصاريف عشان يتفسح ساعتها الناس اللي استضافهم دول هيقولوله تعالي عندنا طبعا وبكدة يبقي اتردله اللي عمله ولقي سكن برضو مجانا

3- في ناس تالته بتستعمله لغرض تحسين اللغه زي ان حد امريكاني عايز يتعلم تركي ف يستضيف ناس اتراك او حد مصري عايز يتعلم روسي ف يستضيف ناس روس الخ الخ

4- ناس بتدخل تشقط بنات وبنات تانيه بتدخل تشقط رجاله و زيتنا في دقيقنا  

طيب اضمن منين انه امان خصوصا للبنات ؟؟ ان المستضيف مش هيغتصبني مثلا ولا هيتاجر ف اعضائي ؟

معظم الناس هتقولك في بوق واحد " من الريفيوهات "

وهيقولولك كل ماكان الهوست واخد ريفيوهات كتيره كويسه دة معناها انه امان اكثر

انا بقي الوحيد ال هقولك ان دة كلام هلس والريفيوهات مبتعبرش ابدا عن المشاكل اللي ممكن تتعرضلها

لان ممكن مثلا مثلا واحد امريكي حشاش يستضيف ناس من كرواتيا مثلا عندة بيحبوا الحشيش ف يقعدوا يرولو مع بعض والناس الكروات يخرجوا من عندة يكتبوا ريفيو ان الراجل دة ميه الميه الميه الميه الميه اسيادنا راضيين عليه

او واحد روسي بيحب يشيش ف استضاف ناس من المجر بتحب تشيش فهيطلعوا من عندة يقولوا عليا الطلاق الراجل دة اجدع من ابويا

القصد يعني الريفيوهات مبتعبرش ابدا عن واقع شخصيه الهوست حتي لو عنده 2000 ريفيو كويس!

.

طيب يا محاميحو امال نعمل ايه يعني عشان نتأكد من الهوست انه محترم وامان ؟؟

ببساطه هتدخل عند الهوست دة هتلاقيه منزل اكونت الفيس بوك وتويتر وانستجرام .. هتعمل سيرش علي كل بوستاته وصوره .. ومن الصور والبوستس دي هتعرف .. هل الراجل دة محترم ولا هلاس

هل متواجد بصورة منتظمه وليه حياه فعليه زي ما كاتب عن نفسه في ريفيو الاكونت ولا مجرد شخص وهمي Fake

هل ليه صحاب كتير وصحابه من نوعيه محترمه ولا شله صيع

هل مثلا لو الهوست بنت وانتي بنت وعايزة تقعدي عندها .. البنت الهوست دي مصاحبه ولاد وبيقعدوا عندها ف الشقه ولا لأ

بعدين هتتكلم معاه سواء ع الماسنجر او واتس قبل ما تروح ومن خلال كلامكم هتعرف تفرز نوعيه الشخص اللي بتتعامل معاه

.

طيب هل الموقع دة للاستضافه فقط ؟؟ مفيش اي انشطه تانيه بتتعمل ؟

في انشطه تانيه زي تجمعات مع اهل البلد ال هتروحها او ناس يوصلوك بالعربيه لمكان معين في البلد اللي رايحها ,, الخ