شاطئ القلعان مرسى علم .. رحلة بـ 500 جنية فقط
كتب : Amr Ayman
المكان ده اسمه خليج القلعان موجود 90 كيلو جنوب مدينة مرسى علم في البحر الاحمر ، القلعان او الجلعان زي ما بيقولوها اهل المكان تبع محمية وادي الجمال الطبيعية و ده اللي بيخلي الطبيعة بتاعت تبهر اي حد يروح هناك.
سافرت بالقطر من القاهرة لادفو ب 30 جنيه و من ادفو عربية لحد مرسى علم ب 52 جنيه.
و بعدين عملت تصريح تخييم ب 55 جنيه من مكنب حرس الحدود في مرسى علم علشان نقدر نبات علي الشاطئ بليل في الكامب هناك ، و القلعان من الاماكن القليلة اللي تقجر تبات فيها علي الشط و تعمل كامبينج .
بعدين عملنا auto stop لحد القلعان يعني بنقف علي الطريق نشاور لاي عربية ماشية في نفس اتجاهنا و تاخدها في سكتها ، الكامب هناك الليلة فيه ب 50 جنيه بس و مش لازم يكون معاك خيمة هما يفضل علي الاقل يبقي معاك منامة .
المميز في الكامب هو ان عندهم حمامات نضيفة جدا و كهربا اغلب الوقت و مطعم و مياه للشرب .
ماية البحر بقى انا مش هتكلم عليها ، المياه تحفه و لونها بيتغير بتغير زاوية الشمس و مناسبة جدا لو حد مبيعرفش يعوم و للاطفال و الرملة هناك ناعمة و لونها يغريك تفضل هناك ومترجعش خالص .
انا كنت بنام علي الشزلونج قصاد البحر و افضل مستمتع وانا شايف قصادي القمر و النجوم و صوت البحر و اصحى علي صوت الطيور و هوا البحر اللي يرد الروح .
الاهم من كل ده هو اهل المكان هناك!
سكان القلعان من قبيلتي العبابدة و البشارية ، ناس في قمة الذوق و الكرم و الجمال ، الناس دول حسسوني انهم اهلي و اني متربي وسطهم من زمان جدا والله العظيم ، يستحيل تروح هناك و متحبهمش! .
لازم لما تروحوا هناك تجربوا مشروب الجبنة و دي القهوة السوداني اللي حكتلكم عنها قبل كده لما روحت حنكوراب .
انا قعدت هناك يومين و رجعت بسبب ان كان عندي شغل ، بس انا لو عليا افضل عايش هناك علي طول.
و انا راجع اخدت اتوبيس من مرسى علم للقاهرة ب 170 جنيه بس.
المكان مش بيديك خيمة
الاكل كان معلبات "فول جبنة تونة كاتشب"
المايه "قارورة كبيرة سعرها 20 جنيه"
0 تعليقات