حقيقة ظهور ثعبان الطريشة في منطقة التجمع

حقيقة ظهور ثعبان الطريشة في منطقة التجمع 

cerastes sahara snakes

كتب: توفيق محمد

مما لا شك فيه إنه جميع الكائنات الحية في البيئة او الطبيعة حوالينا بتخدم غرض معين مهم جدًا، وما ينفعش بأي شكل أو حال من الأحوال إنك تقضي على كائن منهم نهائي لأنه بمثابة أخدك حلقة من سلسلة متكاملة، هتخل بالنظام الطبيعي وتبدأ تظهر نتايج وأضرار لايحمد عقباها.

من المنطلق دا، يبقى إحنا متفقين تمامًا إنه العملية الممنهجة لإعدام قطط وكلاب الشوارع الضالة، هترتد بعواقب غير محمودة والمسؤولين عن عملية الإبادة دي هيندموا أحلى ندم لإخلالهم بالنظام الطبيعي دا، ومفيش انسان عاقل موافق عاللي بيعملوه دا.

تعالى بقى كده الظيطة المنتشرة بقالها كام يوم عن ظهور تعبان الطريشة في المعادي والتجمع وشوية الأماكن دي.. الطريشة cerastes sahara snakes لو انت ماتعرفهاش، فدا ثعبان سام لا يتعدى طوله متر الا ربع ويمتاز بوجود قرنين على رأسه وموجود في الأماكن الرملية والصحراء بتاع شمال أفريقيا.. تمام على كده! النت كله غرقان بالبوستات وأكيد انت شوفت بنفسك وخطر وبرامج عالتلفزيون ودا نتيجة قتل الكلاب والقطط وهجوم حاد وسكان التجمع معدوش هينزلوا من بيوتهم وعلماء حيوان مصريين وحرفيًا الميديا مقلوبة.

دلوقت انت لو فتحت جوجل اخبار وسرشت عن الموضوع، هتلاقي مفيش حد قال إنه شاف الطريشة غير اتنين في التجمع مع بعض وصوروه ونزلوا صورته في بوست طويل كده لف الفيسبوك كله ونزل في الجرايد والمواقع والتلفزيون.

في حد تاني شاف تعابين طريشة! لا مفيش ولا حد تاني وهو بوست الاتنين دول بس اللي بيلف في كل حته ونفس الصورة اللي هما صوروها بتستخدم في كل المقالات والاخبار.

يعني يا سيدي هي حالة بلاغ واحده بس لرؤية التعبان فعلا وتصويره! اه والله مفيش وافتح بنفسك هنا او جوجل وسرش، هو مفيش غير حالة التجمع بس!

يعني الظيطة والقلبان دا كله عشان اتنين شافوا تعبان صحاري في المنطقة بتاعهم! 

يعني لو طلعت دلوقت أنا والعيال نلعب في الشارع، ولقيت تعبان، هيبقى دا هجوم علينا وخطر ونملى السوشيال ميديا ونصعدها تلفزيون كمان! يا بلاش والله يا بلاش.

لغاية هنا وقشطة، دي نا مرفهه ويمكن دا جديد عليهم وعشان كده خايفين من رؤية تعبان ومش هينزلوا من البيوت وحملات ابادة وبتاع.. بدأ الهري بقى يشتغل ويكبر لما ربطوا الموضوع بالعمل المتخلف بتاع القضاء على كلاب الشوارع والقطط اللي احنا ضده طبعًا.

حبيبي، بأي شكل من الأشكال، الكلاب ملهاش ادني علاقة بانتشار التعابين لأنه التعابين مش من فرائيسا اولا ولا اعدائها الطبيعيين.. التعابين مابتخافش من الكلاب بس بتخاف منك انت.. اه والله لو تعبان وبالذات لو سام وشاف كلب، مش هيخاف منه، في حين انه ممكن يخاف من قطة او من طير في السما لانه دول المفترسين الاساسيين ليه.

الكلب لو شاف تعبان، هيعمل ضوضاء وهيحاول يتجنبه، ولو تعدى على مكان التعبان، التعبان ممكن يلدغه فعلا، بس الكلاب نادرا لما هيتهجم على التعبان لانه عارف انه هيتلدغ ويموت، زي الفار لوحده كده لما بيهرب من القطة لانه عارف انها ممكن تقتله (أعداء طبيعين) فصدقني ظهور التعابين او اختفائها، ملوش ادنى علاقة بوجود الكلاب من عدمها في المنطقة، فالشخص اللي ربط الموضوعين دول ببعض، هو محض واحد بيهري عشان يعمل ترافيك ويجيب لايك.

تعبان الطريشة بالرغم من انه سام، لكن لدغته مش ممينه، هي خطيرة اه وهتجبلك بلاوي لو ماتلحقتش، بس في الغالب مابتموتش ودا مش كلامي، ولكن كلام مركز السموم العالمي وفي احصائيات بكده.

فالفتوكة اللي طلع قال وهول انه عضته اخطر عضات العالم و50 مرة اسوء من الكلب والهري دا، يبطل فتي عالناس من فضله.

في بعض أنواع التعابين فعلا بتنشط بالحرارة وبتتحرك بعيد عن مكانها الطبيعي، وفي 100 ألف سبب يخلي التعبان اللي ظهر في الاخبار دا يظهر في المنطقة وممكن حد بيربيه هرب منه وممكن حد جابه وممكن هو سحب لوحده لهنا وغيره وغيره وغيره، بس دا مش معناه حرب عالمنطقة ولا غزوة ثعابين ولا كل القلق والهري وتخويف الناس دا بسبب ثعبان واحد يتيم اتشاف.. لما يبقى اكتر ومشاهدات كتير "متصورة" مش مجرد فلان شاف وسمع، ساعتها يبقى الناس تبدأ تقلق..

زي ما قولتلك الموضوع ملوش ادنى علاقة لأنه الكلاب مابتقتلش التعابين ولا بتطاردها، بل بالعكس هتحاول تنبه صاحبها والمحيطين عشان يبتعدوا عن الخطر، يعني ملهمش علاقة ببعض نهائي.. بس مش هننكر انه في بعض الفصائل من الكلاب اصلا في جيناتها اصطياد التعابين زي البولترير ودا ملوش علاقة بكلاب الشوارع.

النت كله مقلوب والاعلام عشان تعبان واحد :"| لا اله الا الله والله.

وكمية بوستات هري وفتي بتنتشر بشكل غير طبيعي عشان بس يجيبوا لايك وشير وبيستغلوا جهل الناس وقلة درايتهم بالموضوع، وبيخوفوا السكان والاهالي بدون سبب عالفاضي!

اعدام الكلاب ليه اضرار اه، بس مهياش دي، هتظهر كمان شوية مش علطول كده.

فياريت تساعد في تفهيم الناس أكتر وتوعيتهم بدل ما تساعد في نشر الجهل والتخريف وشير الصح بدل الغلط.