بالتفاصيل.. كيفية الحصول على عقد عمل في كندا

بالتفاصيل.. كيفية الحصول على عقد عمل في كندا

كتب:

 احمد محمد 

طبعا اول لما تقرأ عنوان البوست هتسأل نفسك سؤال مشهور 

ليه بلد زي كندا ممكن تعمل اوبشن او فيزا مخصوص ل انها تجيب ناس بعقود عمل مؤقته في حين انها عندها مليون سيستم ونظام للهجره المباشره ؟

مهو انا كدوله بدل ما اجيب واحد حتي لو هو عالم او دكتور او مهندس يقعد عندي سنه ولا اتنين .. منا اجيبه هجره كامله وابقي استفدت بيه للابد ؟

ركز معايا بقي اوي عشان تفهم لان قسما بالله الكلام دة محدش هيقولهولك

في مشكلة كبيرة جدا بتحصل داخل سوق العمل الكندي وسببها الناس اللي داخلين البلد على اساس انهم عمالة ماهرة ونتيجة لتكلفة وصعوبة الحصول على الترخيص لمهنتهم بيتوجهوا لمهن اخرى غير تخصصهم ، وبالتالي بيحصل عجز في المهن اللي هما اساسا مهاجرين علي اساسها 

.--------------------------------------------------------------

لا لا لا بالراحه عليا كدة يا دكتور احمد انا مش فاهم حاجه .. علي مهلك كدة وفهمني يعني ايه ال بتقوله دة ؟

هفهمك .. كندا مبتعترفش بأي شهادة تعليم خارج القطر الكندي .. يعني حتي لو انت خريج هارفارد الامريكيه لازم تعادل شهادة هارفارد دي عشان تشتغل في كندا ... ولكن كندا مبتطلبش منك معادله شهادتك الا بعد الهجره .. يعني في الاجراءات يادوب تقييم للشهادة فقط ولما تسافر بقي انت حر تعمل معادله او متعملهاش دي بتاعتك

ونتيجه لكدة ملايين بيسافروا وبيعملوا شيفت كارير او بيشتغلوا اي اشغال وينسوا فكره المعادله خصوصا للتخصصات الطبيه بمختلف انواعها اللي بيقعدوا بال 4 و 5 سنين عشان يعادلوا شهادتهم دة غير المصاريف الكبيرة للمعادله دي

يعني ببساطه الناس بتاخد كندا كوبري للوصول وخلاص .. يعمل تقييم عشان يخلع بسرعه من بلده الام ولما يوصل يفكس لمهنته خالص ويشتغل اي حاجه تانيه 

وبكدة العجز في التخصصات دي بتظهر

هبسطهالك اكثر واكثر .. نفترض ان كندا اختارت 1000 طبيب مثلا في سحبه من سحبات الاكسبريس انتري علي اساس انهم يروحوا ويشتغلوا دكاترة ويغطوا العجز في النظام الصحي .. جميل جدا جدا .. ال 1000 طبيب دول بقي بيروحوا يسافروا و 90% منهم بيغيروا مهنتهم او مبيعادلوش شهادتهم .. وبالتالي العجز في المهن بيفضل موجود 

.

عايز تتأكد من كل الكلام دة ؟ 

دة لينكات تقارير كامله عن العجز الكبير اللي حاصل دلوقتي في القطاع الطبي .. وهيمتد للاسؤا في ال 10 سنين الجايين في كندا

1- https://www.cbc.ca/…/doctor-shortage-puts-pressure-on-small…

2- https://www.fraserinstitute.org/…/canadas-doctor-shortage-w…

3- https://www.omicsonline.org/…/physician-shortage-problem-in…

.------------------------------------------------------------------------

معقول الحكومه ساكته علي الكلام دة ؟

اكيد طبعا مسكتتش .. حكومه كندا حاولوا يقدموا مساعدات للناس دي والسنة اللي فاتت عملوا برنامج قروض من الحكومة لتغطية مصاريف امتحانات التراخيص والمعادلات .. والقروض دي تسددها كامله بعد ما تشتغل .. لكن برضو المشكله فضلت موجودة لأن المهاجر يقولك وانا ايه اللي يربطني ويخليني اخد قرض علي نفسي وعليه فوائد ويا عالم هلاقي شغل بعد المعادله ولا لأ .. يبقي كدة لبست خازوق وربطت نفسي بقرض لازم اسدده .. لا ياعم انا مش لاعب .. منا باكل وبشرب وبنام وعايش احلي عيشه ومن غير شغل بشهادتي .. بلا معادله بلا زفت (دة تفكير 90% من المهاجرين هناك )

وعايز تتأكد من الكلام دة .. خش علي موقع الحكومه الكنديه CIC عندهم برنامج هجرة الحرفيين .. حاليا بقي بيقبلوا فيه اعداد قليلة جدا ودة لان للاسف اصحاب المعادلات والعمالة الماهرة الكبيرة اللي سافروا كندا بقوا يشتغلوا في الوظائف الحرفية في كندا يعني قطعوا عيش الحرفيين ال عايزين يهاجروا لان المنافسه بقت كمان من العماله المهره اللي هناك .. 

.

فالعجز في التخصصات الكبيرة بيفضل قائم دي لان مساحه كندا كبيرة جدا وعدد خريجي الجامعات الكنديه مقارنه بمساحه كندا الشاسعه قليلين جدا .. والمهاجرين مش عارفين يسدوا العجز دة فبيلجاوا ل ال emergency door وهي استقدام ناس عندهم المؤهلات الكبيرة دي ال تسد العجز دة ولو مؤقتا ..

.------------------------------------------------------------------

طيب ما يريحوا نفسهم ويخلوا شرط من شروط الهجره انك تعمل معادله الاول قبل ما تهاجر زي استراليا كدة .. وبكدة يضمنوا ان كل ال يهاجر يشتغل في مجاله ؟؟ 

.

مش هيحصل ولو بعد 100 سنه .. لسبب بسيط .. كندا الهدف بتاعهم الأكبر أبناء المهاجرين مش المهاجر نفسه

كندا عايزين الجيل الثاني والتالت من المهاجرين و مش مهتمين ب الجيل الاول .. لان الجيل الثاني هم الكنديين الفعليين اللي اتولدوا في كندا وعاشوا فيها ودرسوا فيها .. يعني من الاخر المهاجر نفسه بيكون طرف ثانوي في المعادله

فهو عايزك لا تعادل ولا تنيل .. اهم حاجه تيجي بس وتجيب عيالك بشنطه هدومهم .. وانت ومراتك فوق البيعه .. باكيدج كدة .. زي شامبو 2 في 1

.--------------------------------------------------------------------

معلش يا دكتور بس الكلام دة مش مظبوط!! لو كلامك صح وهما عايزين اطفالنا فقط تقدر تقولي ليه بيشترطوا علينا كل الشروط الصعبه دي للهجره ؟؟

.

اشتراط المؤهلات واللغات والخبرات اللي بتعمله الحكومه ده مجرد محاولة منهم ل انتقاء الأفضل و الأصلح للتأقلم مع المجتمع الكندي .. هما لو عليهم يا ابني مش مقتنعين اساسا ان تعليمك و دراستك ال درسته خارج القطر الكندي هيتماشي مع النظام القائم عندهم و خصوصا الطبي.. بس هو بيبص انك عندك قدره للتأقلم اكتر لحكم الثقافه المكتسبه من التعليم اللي اتعلمته في بلدك الام

مهو برضو مش هيروح يجيب واحد سرسجي هو وابنه ويزرعهم في المجتمع لمجرد انه محتاج اطفال .. هو ايوة محتاج اطفال لكن يكونوا متأسسين صح واهلهم عندهم قدر معين من الثقافه والتعليم عشان يندمجوا ف المجتمع

------------------------------------------------------------

 بس انا سمعت من كذا حد ان لازم الشركه ال هتشغلك تثبت للحكومه واداره الهجره ان مفيش زيك اتنين ع الكوكب وانهم مش عارفين يلاقوا حد من جوة كندا .. ايه صحه الكلام دة ؟

.

دة صحيح بالفعل بس كن زمان وانتهي .. زمان كان اي حد عايز يروح بعقد عمل لازم يحقق شرط ال LMIA وهي اختصار ل Labour Market Impact Assessment ودة عباره عن ان الشركه او المؤسسه اللي هتعرض عليك job offer كانت لازم تثبت لوزاره العمل انها ملقتش اي حد من جوة كندا يصلح للوظيفه دي وعشان كدة هتجيب حد من بره .. فكان الموضوع صعب جدا جدا 

.

لكن في يوليو 2018 الحكومه الكنديه لغوا شرط ال LMIA لوظائف كثير جدا و لناس كثير جدا .. ادخل علي اللينك الرسمي دة من موقع الحكومه الكنديه هتلاقي انهم اعفوا فئات كثيرة جدا من الشرط دة .. يعني عايزين ناس تيجي بأي شكل عشان تغطي العجز دة .. مش مهم عندهم بقي في حد في كندا يقدر يشتغل الشغلانه دي ولا بطيخ .. معاك عرض عمل يبقي تعالي يا سيدي .. لا لميا ولا محاسن .. تعالي بالاحضان بالاحضان ..

https://www.canada.ca/…/d…/offer-employment/lmia-exempt.html

-------------------------------------------------

طيب يا ابو حميد انت كل دة مقولتش ازاي اساسا تجيب عرض عمل في كندا ؟

الصعوبه كلها حاليا انك تخلي مؤسسه تبع تخصصك تعرض عليك عرض عمل عشان اكبر مشكله بتواجه الناس وهي " الخبره الكنديه "

لكن في ناس كثير بتتغلب على الموضوع دة والفئات دي هم الاكثر حظا في عروض العمل .. زي :

1- ناس بتسافر عن طريق الشركات المالتي ناشونال ال بيشتغلوا فيها سواء ف مصر او الخليج 

بيعتبروهم Intra Company Transfer وبيتلغي من عليهم شرط ال LMIA

.

2- ناس درسوا في كندا سواء بالمنح او علي حسابهم سواء بكالريوس او ماستر وبقي عندهم خبره كنديه في سوق العمل او شهادة كنديه اصليه ..

هتلاقي هنا كل تفاصيل الدراسه في كندا والتأهيل للعمل بعد الدراسه هنا حسب المقاطعة وحاول تختار جامعة بتدي post-graduation work permit

(PGWP)

عشان تقدر تمد إقامتك بعد الدراسة وتبحث عن عمل وتقدر تقدم هجرة وانت هناك

https://www.canada.ca/…/designated-learning-institution-por…

.

3- عن طريق معادله الشهادة بتاعتك في كندا وكل مهنه وليها طريقها لكن كبيطري ودي مهنتي هي اسهلهم في الشغل خصوصا لو هتشتغل ف ال Locums بعد المعادله عشان تحصل علي خبره كنديه تؤهلك انك تجيب عرض عمل بسهوله ( هتكلم عنها بالتفصيل قريب ) 

.

طيب افرض انت غلبان ومعندكش علاقات ولا بطيخ .. كالعادة مش قدامك غير مواقع الوظيف الكنديه

Eluta. ...

Workopolis

Jobboom. ...

Glassdoor. ...

Monster. ...

Simply Hired. ...

Indeed. ...

LinkedIn. ...

وطبعا لازم تعمل CV قوي عشان يبقالك فرصه في الانترفيو وانهم يختاروك

وعموما فرص المبرمجين وال web developers هناك عاليه جدا

وطبعا مش محتاج افكركم ان كالعادة هفضل اقول ف كل بوست عن عقود العمل ان في ناس في الحياه فرصتهم اكبر من ناس ومتعترضش لان دي حكمه ربنا .. طبيعي فرصه اول 3 امثله ال ذكرتهم هتكون اكبر من واحد قاعد في مصر .. شغال في شركه مصريه فقط .. شهادته مصريه فقط .. لكن طبعا مفيش مستحيل .. اسعي وسيب النتيجه علي ربنا