كيف تهاجر الى بريطانيا.. طرق الاقامه والاستقرار هناك
مبدأيا مفيش في انجلترا نظام رسمي للهجره زي اللي بتعمله كندا واستراليا لكن في طرق كتير للسفر لانجلترا والاقامه فيها
.
انواع الفيز اللي ممكن تسافر بيها لانجلترا
1- فيزا سياحيه ( زياره )
2- فيزا دراسيه وليها كذا نوع
3- فيزا عمل وليها كذا نوع
4- فيزا لم الشمل وليها كذا نوع
5- فيزا استثمار
اخر نوع ميهمناش في الهجره .. هنتكلم عن باقي الانواع بالترتيب في صيغه سؤال وجواب
-----------------------------------------------------------------------------------
الجزء الاول فيزا السياحه :
انا معايا فيزا سياحه لبريطانيا هل ممكن لما اسافر بيها اظبط وضعي من وانا هناك ومرجعش؟
السؤال بمعني تاني .. ازاي استفيد من فيزا السياحه اللي معايا ؟؟
.
.
فيزا الزياره ل UK بتكون صلاحيه 6 شهور ( من اول مره ) وغير مسموح بتمديدها أو تحويلها لأي نوع اخر من انواع الفيز والاقامات ولازم ترجع لبلدك بعد انتهاء مدة التأشيرة ..
.
كيف تستفيد منها ؟؟
عن طريق انك في خلال فتره صلاحيه الفيزا تحاول تجيب قبول جامعي لدراسه ماجستير او دكتوراه مثلا من جامعه في تخصصك أو تحاول تتعرف علي حد بريطاني بغرض الزواج أو تحاول انك تشوف حد يعرف يجبلك عقد عمل في تخصصك .. وفي ال 3 حالات لازم تغادر ال UK وترجع لبلدك وتبدأ الاجراءات من الاول مع السفاره في بلدك لكن غير مسموح ليك انك تحول الفيزا السياحيه من وانت في انجلترا ..
لازم لازم ترجع بلدك وتقدم علي نوع الفيزا الجديد وتسافر علي فيزا بنوعيه تانيه جديده ..
.
اكثر طريقه شائعه للاستفاده من فيزا السياحه البريطانيه ان ناس كتير اعرفها بتروح تحضر مؤتمرات علميه في تخصصهم في UK بفيزا الزياره العاديه دي وبعد كدة بيعرفوا يجيبوا سبونسر للماجستير او الدكتوراه بتاعهم من هناك ويرجعوا مصر و يسافروا مره تانيه ال UK بقي بس المره دي يأما بمنحه مموله بالكامل يأما بمنحه مدفوعه جزئيا .. وطبعا بعد الدراسه لو لقوا شغل في تخصصهم بيقدروا ياخدوا اقامه مؤقته تليها اقامه دائمه .. ويستقروا بعدها في UK
.
عشان كدة فيزا الزياره لل UK مهمه وتقدر تستفيد منهم كتير في طريقك للحصول علي اقامه فيما بعد ..
.
تلات اسئله متكرره بتتسأل بخصوص فيزا السياحه ب 3 اجابات تفصيليه بالفيديوهات :
1- معايا فيزا سياحه وبفكر اكسرها واشتغل اسود فيه خطورة عليا ؟؟
الاجابه في الفيديو دة
.
2- معايا فيزا سياحه وبفكر اقدم لجوء لما اوصل تفتكر ممكن فعلا اتقبل والعمليه سهله ولا فنكوش ؟
الاجابه في الفيديو دة
.
3- ممكن تقولي الاجراءات لفيزا السياحه لل UK بالتفصيل الممل ؟؟
الاجابه في الفيديو دة
----------------------------------------------------------------------
الجزء التاني : فيزا الدراسه :
انا عايز ادرس لغه انجليزيه في ال UK ايه الاجراءات بالتفصيل ؟
انا عايز ادرس تخصص كامل في UK غير تخصصي اللي درسته في مصر ينفع ؟؟
ازاي اخد تأشيرة الدراسه في UKومصاريف الدراسه بتكون كام ؟
.
.
مبدأيا الدراسه في UK طريق كويس عشان الهجره ولكن طريق طويل وعايز نفس طويل .. الناس بتروح تدرس هناك سنتين أو تلاته أو اربعه في تخصص معين وبعد الدراسه بتحاول تدور علي شركه في تخصصهم ياخدوا من خلالها اقامه عمل ثم اقامه مؤقته ثم اقامه دائمه ثم التقديم للحصول علي الجنسيه
طبعا طريق طويل وعايز ناس عندها صبر وعندها main target علي المدي البعيد و ليهم في سياسه النفس الطويل
.
اولا هنتكلم عن دراسه اللغه :
نوع الفيزا اللي بتقدم عليها لدراسه اللغه اسمها short term study visa ..
دة نوع من التأشيرات بيسمح للشخص انه يدرس داخل UK لمدة اقل من 6 شهور أو 6 شهور أو اكثر من 6 شهور بتوصل ل 11 شهر كحد اقصي ..
.
الناس بتروح تدرس كورس لغه مكثف تحضيري في UK وبعدين بيكون ليهم طريقين ..
• الطريق الاول ان في ناس بتستفيد منه في الCV بتاعها عشان الوظائف في الشركات المالتي ناشونال في الخليج اللي عن طريق الشركات دي يقدروا يروحوا UK في المستقبل بعقود عمل انتداب ( هنشرحها بالتفصيل الممل بعدين ) ..
• الطريق التاني ان في ناس تانيه بعد ما تخلص دراسه اللغه في UK بيدخلوا علي دراسه التخصص بعدها مباشره في الجامعات وتكمل نفس الخط اللي قولنا عليه في الاول
.
.
اسباب اقناع القنصل بالغرض من السفر لدراسه اللغه :
1- تكون حاصل علي كورس معتمد او وصلت ل ليفل معتمد في بلدك في الانجلش وعندك شهادات بكده وتكون دراسه اللغه في ال UK مجرد تكمله لدراستك السابقه للغه في بلدك
.
زي ان واحد مثلا عايز يدرس تخصص رئيسي في انجلترا زي الطب مثلا , ولكن الجامعه هناك حاطه شرط للدراسه انه يجيب ايلتس 7.5 .. ويكون دخل الايلتس كذا مره في بلده لكن مش عارف يوصل للاسكور ده
ساعتها يقدم بالادله والشهادات انه اولريدي فعلا خد الايلتس في بلده بسكور متوسط جدا والاسكور ده مسببله عائق كبير في الدراسه الرئيسيه وعايز يروح يدرس لغه في UK كورس تكميلي مكثف عشان يعرف يعدي ال 7.5 بتوع الايلتس لما يرجع لبلده
.
وكل دة بتشرحه في ورقه منفصله عن الابلكيشن بنسميها personal statement ودي بتوضح فيها سببك من الزياره بالتفصيل وترفق معاها كل الادله والشهادات والوثائق اللازمه
.
.
2- لازم يبقي فيه تناسب بين دخلك وبين تكلفه الرحله والعيشه في UK وبين تكلفه الدراسه
بمعني مينفعش تصرف كل ما تملك وكل اللي حيلتك واللي وراك واللي قدامك علي رحله واحدة بغرض دراسه اللغه فقط .. الشك فيك هيبقي اكبر بكتير انك بتعمل المستحيل عشان توصل بأي طريقه
.
علي سبيل المثال
انت مثلا شغال بقالك 3 سنين و بتقبض كل شهر 3000 جنيه مثلا .. وحوشت ف البنك خلال التلات سنين دول قول 40 الف جنيه .. وتكاليف الدراسه هناك للانجلش مع تكاليف الرحله كلها من اقامه ومصاريف هنقول هتوصل ل 40 الف جنيه
هنا القنصل هيقول .. ازاي واحد هيصرف كل اللي معاه وكل اللي حيلته ويخلي رصيده في النهايه صفر في البنك بعد انتهاء الرحله وهيبقي ممعاهوش ولا مليم بعد كدة في البنك لمجرد انه يروح عشان يدرس كام شهر عندنا في الانجليزي
لازم يبقي فيه تناسب بين دخلك وبين تكلفه الرحله والعيشه في UK وبين تكلفه الدراسه .. ويبقي معاك مبلغ بيغطي ويزيد لتكاليف الدراسه ومتناسبه مع تكاليف رحلتك ودخلك الشهري في بلدك
تكاليف المعيشه عموما ف UK شهريا حوالي 1000 استرليني حد ادني .. شوف انت بقي هتدرس مده قد ايه وتكاليف دراستك قد ايه وحسابك البنكي قد ايه واحسب حسبتك كويس قبل ما تقدم ..
.
.
اجراءات فيزا دراسه اللغه في ال UK :
هتدخل علي جوجل وهتبحث عن كل المعاهد والجامعات اللي بتدرس لغه في انجلترا وتدخل علي موقع كل جامعه وتشوف شروط الدراسه وتكاليفها .. لو الشروط منطبقه عليك وتكاليفها مناسبه ليك هتراسلهم علي ايميل الجامعه عشان تجيب منهم خطاب قبول جامعي
.
ولازم خطاب القبول offer letter يكون موجود فيه اسم الدوره ومدة الدوره ورسوم الدراسه وتكاليف الاقامه ومختومه من المعهد او الجامعه
وبعد كدة هتدخل علي موقع www.visa4uk.fco.gov.uk وتقدم علي short term study visa ودي رسومها 93 استرليني لو دراسه اللغه 6 شهور او اقل .. لكن لو 11 شهر رسوم فيزا هتكون 1799 استرليني
.
ويكون معاك كشف حساب بنكي ليك او لوالدك او لوالدتك مع تعهد منهم بتحمل تكاليف دراستك ويكون الحساب لاخر 6 شهور وعليه طبعا حركه سحب وايداع
والاتش ار ليتر بتاعك من شغلك لو بتشتغل او السجل التجاري والبطاقه الضريبيه لو صاحب عمل أو شهادة قيد من الكليه لو لسه طالب
وباقي الاوراق زي الباسبور و صور منه وصور شخصيه ليك وطبعا القبول الجامعي اهم ورقه وتقدم كل الاوراق انجلش مش عربي الخ الخ ..
.
.
ثانيا : دراسه التخصصات الرئيسيه في UK :
-لو عايز تدرس تخصص كامل بقي في UK لازم تعرف 6 حاجات مهمين جدا :
1- نوع الفيزا اللي هتقدم عليها اسمها Tier 4 (General) student visa ودي بيحق ليك تحوليها وانت داخل ال UK لفيزا عمل Tier 4 عكس فيزا دراسه اللغه اللي مبتتحولش ابدا لفيزا عمل
.
2- انه لازم يكون معاك ايلتس او تويفل وبدرجات عاليه عشان تعرف تجيب قبول جامعي من جامعه في انجلترا لتخصصك
.
3- لازم تعرف ان دراسه التخصصات في UK غاليه جدا جدا فلازم يكون معاك فلوس كتير لأن متوسط الرسوم في اي جامعه بريطانيه لاي تخصص بتبدأ من 8000 سترليني في السنه وبتوصل ل 15 و 20 الف سترليني في السنه لبعض التخصصات .. وفي جامعات بيكون ليها سعرين للدراسه .. سعر للطالب الاوروبي والبريطاني .. وسعر تاني للطالب الدولي للي جاي من برا اوروبا زيك كدة
.
4- بعد ما تجيب القبول الجامعي لتخصصك هتدخل علي موقع السفاره وتقدم علي Tier 4 ولازم يكون معاك كشف حساب بنكي يغطي تكاليف الدراسه كامله ويكون متناسب مع تكاليف المعيشه ومع دخلك زي ما شرحنا في فيزا اللغه
.
5- رسوم النوع ده من الفيز بيكون ب 335 استرليني
.
6- بيحق ليك بفيزا الدراسه اثناء الدراسه انك تشتغل بارت تايم 20 ساعه في الاسبوع وبيكون معظمه شغل كاجوال في المطاعم والسيلز وبعد انتهاء الدراسه بتقدر تجيب عقد عمل في تخصصك وتاخد اقامه مؤقته وتستقر بعدها في UK ..
.
.
ملحوظه مهمه : لو عايز تدرس تخصص غير تخصصك اللي درسته في مصر .. ساعتها هتواجه صعوبات ان الجامعات كلها هتطلب GPA وتقديرات للمواد اللي في التخصص الجديد .. وانت اكيد مش معاك درجات فيها لانك مدرستهاش اساسا في مصر .. ساعتها احنا بننصح الناس انها الاول تدور علي كورسات معتمدة في التخصص الجديد كأنها كورسات تمهيديه كدة .. ولما تخلص منها تقدر بعدها تقدم بقي علي الجامعات البريطانيه وانت حاطط رجل علي رجل
.
علي سبيل المثال
انت دكتور أو مهندس مثلا في مصر .. وزهقت من الدكتره و مسطره حرف t .. وعايز مثلا تروح انجلترا عشان تدرس تصوير .. ساعتها متروحش تقدم علي الجامعات مباشره اللي فيها تخصص تصوير في UK .. لا تروح الاول تاخد كورسات معتمدة في التصوير سواء في بلدك او في UK وبعد بقي ما تخلص الكورسات دي تقدر تقدم بعدها علي الجامعات الكبيرة عشان موقفك يبقي قوي ..
.
.
- لو مش معاك فلوس الدراسه يبقي مفيش قدامك غير طريق المنح :
والمنح في انجلترا يا مموله بالكامل يا مموله جزئيا .. اشهر منح انجلترا Chevening طبعا .. ومعظم المنح المموله بالكامل بيطلبوا منك انك تغادر UK بعد انتهاء مدة الدراسه عشان تفيد بلدك الام باللي اتعلمته عندهم ودة بيكون شرط جزائي ولازم توافق عليه
.
وعشان تعرف ازاي تجيب منحه في انجلترا او اي بلد في العالم ادخل علي اللينك دا وانت هتعرف كل الشروط والتفاصيل وخبايا المنح
الدليل الشامل للحصول علي المنح في جميع التخصصات في مختلف الجامعات
|
كيفية الحصول على منحة دراسية في المانيا, امريكا, كندا, بريطانيا او تركيا
.
.
- لو انت اقل من 18 سنه وعايز تدرس في UK :
بتقدم علي نوع اسمه Tier 4 (Child) student visa ودي اجراءاتها هي هي نفس الطريقه اللي فوق ونفس التفاصيل باستثناء الشرط الزيادة الوحيد في النوع ده يكون موافقه الاب او الام كتابيا انهم موافقين انك تروح تدرس هناك ..
وطبعا بدل ما بتراسل جامعه او معهد .. هتراسل مدرسه حسب السنه والفئه الدراسيه بتاعتك
ورسوم الفيزا دي 335 استرليني
الجزء الثالث : فيزا العمل :
انا عايز اسافر انجلترا بعقد عمل .. هل فعلا في عقود عمل لانجلترا من خارج الاتحاد الاوروبي ولو فيه ايه الاجراءات والشروط والتفاصيل ؟؟
سؤال بمعني تاني .. انا في واحد عارض عليا شغل بعقد عمل في UK ازاي اعرف انه نصب ولا حقيقي ؟؟
.
.
فيزا عمل في UK متشعبه جدا وليها اكثر من نوع اساسي وانواع فرعيه كتيره
في منها Tier 1 و Tier 2 و Tier 5 ..
واللينك دة تقدر تعرف منه جميع الانواع لفيزا العمل بالتفصيل الممل
.
سيبك من ال Tier 1 دلوقتي عشان هتكلم عنها بالتفصيل كمان شويه .. خلينا في النوعين التانيين ال tier 2 وال tier 5
.
.
اشهر طريقين الناس بتعملهم عشان يسافروا انجترا بعقود عمل :
الطريقه الاولي : حاجه اسمها Tier 2 (Intra-company Transfer) visa ..
ودي عباره عن ان شركتك في مصر ليها فرع في Uk وعايزة تبعتك هناك انتداب عشان تشتغل
أو انك تكون اولريدي بتشتغل في شركه بريطانيه الاصل في دبي أو قطر .. وبرضو الشركه تكون عايزة تعملك انتداب لفرعها في بريطانيا
.
والنوع ده من الفيز بتكون اقامه مؤقته سنه او اتنين او تلاته .. مجرد اقامه مؤقته بتتجدد .. والناس بتروح بنوع الفيزا ده عشان تقوي ال CV بتاعهم ويكون بقي عندهم Local experience في الشغل في بريطانيا ويعملوا شبكه علاقات واسعه هناك و يقدروا بعدها انهم يجيبوا عقود عمل لشركات اكبر واقامه دائمه فيما بعد .. لان اكيد صاحب العمل البريطاني لما يعوز يجيب واحد يشغله هيجيب واحد اشتغل اولريدي في UK كام سنه قبل كدة وعارف نظام الشغل والحياه .. عكس واحد تاني برا البلد خالص و صفر خبره بنظام البلد ونظام الحياه والشغل في بريطانيا فرصته بتبقي اقل ..
.
.
الطريقه التانيه : انك تكون بتدرس اولريدي في UK تخصص معين بفيزا Tier 4 وتلاقي حد هناك في تخصصك يشغلك وتقدر تحول Tier 4 ل Tier 2 من وانت داخل ال UK
.
.
ملحوظه : لو فيزتك للدراسه فيزا لغه فقط مش هتقدر ابدا انك تحولها ل tier 2 ..
ملحوظه كمان : ال au pair اللي هو موضوع انك تبقي جليس اطفال او بيبي سيتر وتسافر علي حساب العائلات الانجليزيه مجانا دة مش مطلوب في انجلترا للاجانب وبيجيبوا ناس من الاتحاد الاوروبي فقط
.
.
الشروط اللازم توافرها عشان تقدر تقدم علي فيزا العمل Tier 2 وانت خارج انجلترا :
1- يكون عندك job offer من انجلترا .. ودي مش هتعرف تجيبها وانت برا انجلترا الا لو معاك انجلش كويس اوي اوي ومعاك شهادات خبره وتخصص في مهنتك بالاضافه للعلاقات والمعارف الواسعه اللي لازم تكون عارفها جوة ال UK ..
.
2- تكون مهنتك اللي هتروح تشتغلها هناك من ال skilled jobs
والحكومه البريطانيه وال home office حددت اسماء وقوائم المهن اللي بيسمحوا بيها للاجانب انهم ييجوا بيها لل UK
عشان عندهم عجز فيهم .. وتقدر تشوف قائمه الوظائف دي من اللينك دة
.
مبدأيا شغل الفنادق والمطاعم والسيلز وكل الهري ده مش مطلوب في انجلترا ومش موجود في قوائم ال skilled jobs يعني لو حد قالك تعالي هظبطك واجبلك عقد عمل في فندق او مطعم او في محل اعرف انه نصاب وش
.
3- تكون شركتك اللي هتشغلك من الشركات المؤهله والمُرخصه في UK لتشغيل الاجانب بالنوع ده من الفيز اللي هو tier 2 and 5 visa وبنسميهم licensed sponser وبرضو الحكومه البريطانيه حددت 30 الف شركه مُعتمدة اللي ليهم الحق فقط في الانواع دي في الفيز
وتقدر تشوفهم من اللينك دة
.
4- الشركه الانجليزيه لازم تعمل حاجه اسمها resident labour market test يعني الشركه تعلن عن الوظيفه الفاضيه لمدة 28 يوم عشان الناس اللي جوة البلد يتقدموا عليها .. لو محدش اتقدم بتقدر الشركه بعدها انها تجيب ناس من برا ال UK ..
.
ملحوظه : لو انت موجود في بريطانيا بفيزا دراسه tier 4 وصاحب الشغل عايز يشغلك وقتها مش شرط انه يعمل اعلان عن الوظيفه لانك هتُعتبر موجود في UK بأقامه اولريدي
.
5- لازم يكون الراتب السنوي اللي هتقدمه الشركه ليك بتاع الوظيفه اللي هتشتغلها ميقلش عن 20 الف استرليني و 800 باوند قبل الضريبه بأي حال من الاحوال لو انت لسه خبره قليله .. وميقلش عن 30 الف سترليني في السنه قبل الضريبه لو انت خبره كبيرة ..
( ساعات بتوصل الشروط ان الراتب السنوي ميقلش عن 40 و 70 و 100 الف استرليني )
.
.
6- الشركه بتديك حاجه اسمها Certificate of sponsorship ان الشركه ليها رخصه انها تشغل الاجانب ودي مهمه جدا جدا جدا عشان تقدم بيها علي ال tier 2 visa
.
وليها نوعين restricted and unrestrictedd ..
انت بقي عشان جاي من برا ال UK هتحتاج ال restricted Certificate of sponsorship
.
مدة النوعيه دي من الفيز بتكون من سنه ل 5 سنين اقامه مؤقته ... وبعد ال 5 سنين اقامه مؤقته تقدر تقدم علي الاقامه الدائمه وبعدها تقدر تقدم للحصول علي الجنسيه
.
.
في المواقع العالميه وانا بتصفحها لقيتها شارحه نظام الفيزا دي بنظام النقط ومسمينه Tier 2 Visa Points System اللي هو لازم تكون جايب 70 نقطه عشان تعرف تقدم علي الفيزا
.
ومقسمين ال 70 نقطه دول علي كل العوامل اللي فوق دي .. هي هي نفس طريقه الشرح لكن معقدينها .. متشغلش بالك بالتقسيمه بتاعتهم دي .. امشي بس علي الكلمتين اللي انا كتبتهملك دول عشان متتلخبطش .. لان انت اولريدي عشان تجيب ال 70 نقطه لازم يكون معاك كل اللي فات ده .. يعني هي هي بس شارحينها بطريقه مُعقده ..
الجزء الرابع : فيزا لم الشمل ( زواج - عائلات ) :
.
انا اتعرفت علي واحدة من UK وعايزين نتجوز ايه الخطوات والاجراءات ؟؟
.
* فيزا الزواج : اسمها marriage visa او Spouse visa :
الشروط اللازمه :
1 - لازم يكون الزوج او الزوجه الاجنبيه اللي هتتجوزها يأما معاهم جنسيه بريطانيه يأما معاهم اقامه دائمه في بريطانيا لكن لو الشخص اللي هتتجوزة معاه اقامه مؤقته فمينفعش
.
2- لازم يكون الزوج او الزوجه اللي هتتجوزها مرتبهم السنوي ميقلش عن 18 الف سترليني و 600 باوند لو الشخص دة بدون اطفال ..
لكن لو الشخص ده معاه اطفال لازم مرتبه السنوي ميقلش عن 22 الف سترليني و 400 باوند باضافه 2500 سترليني عن كل طفل زياده ..
.
3- لازم الزوج او الزوجه ده يقدموا للحكومه البريطانيه كشف راتبه لاخر 6 شهور كاملين وكشف حسابه في البنك برضو لاخر 6 شهور كاملين و يقدم عقد الشغل بتاعه مع الشركه اللي شغال فيها وبيقبض منها وكل ده بيكون قبل التقديم علي الفيزا .. ولازم الزوج أو الزوجه تثبت ان معاها سكن مناسب في UK بعقد ايجار رسمي في UK ..
.
4- لازم يكون فيه اثبات ان العلاقه حقيقيه .. زي ان الزوجه البريطانيه دي تكون زارتك في مصر اكثر من مره وتقدم البوردينج باص بتاعها وتذكره الطيران و تكونوا عملتوا حفله جواز وبطاقه دعوة للجواز للاسره وخلافه .. صحيح مش من شروط الفيزا ابدا ان يكون ليكم صور كتير جدا مع بعض .. أو حتي محادثات شات و واتس مستمره خلال فتره طويله .. لكن عشان نكون واقعيين مفيش اثبات للعلاقه دي من غير الصور والشات ..
.
5- يكون معاك Ielts life skills بمستوي A1 في الانجلش ويكون مُعتمد عشان تثبت انك هتعرف تتواصل مع مراتك دي مش هتقضيها لغه الاشاره
.
6 - التقديم اونلاين ورسوم فيزا الزواج لو هتقدم عليها من برا بريطانيا هتكون 1500 سترليني .. لكن لو هتقدم عليها من داخل ال UK لازم تكون فيزتك اللي انت دخلت بيها بريطانيا صلاحيتها 6 شهور قدام يعني تكون يا فيزا عمل يا فيزا دراسه كامله يا فيزا خطوبه .. لكن مينفعش تكون جوة ال UK بفيزا سياحه او بفيزا دراسه لغه وتقدم علي فيزا الزواج دي مينفعش
.
والاجراءات بتاخد 3 شهور اقل حاجه لو انت من برا بريطانيا .. وبعد كدة لو وافقوا علي الفيزا بيديك فيزا لمدة 3 شهور عشان تروح ال UK خلالهم وتحصل علي اقامه مؤقته لمدة سنتين ونص اسمها Biometric Residence Permit وبيجيلك علي اقرب post office اللي كتبته في الابلكيشن .. وطبعا بعد السنتين ونص ما بيخلصوا بتجددهم تاني لمدة سنتين ونص .. وبعد مرور خمس سنين كاملين من تواجدك في UK بفيزا زواج بتقدر تحصل علي الاقامه الدائمه
.
فيه طبعا خدمه " مستعجل " ممكن تخلص منها الاجراءات في شهر واحد بس لكن طبعا كله بتمنه وهتدفع فلوس كتير في الخدمه دي
الجزء الخامس : فيزا الاستثمار : .
في انواع كتير جدا من فيز الاستثمار في UK لكن احنا هنتكلم عن اشهر الانواع اللي الناس بتسافر بيها كأستثمار في بريطانيا وهي فيزا الاستثمار Tier 1 Entrepreneur Visa
شروط الحصول علي فيزا الاستثمار لانجلترا :
الشرط الاول ان لازم الشخص المُستثمر يكون معاه مبلغ لا يقل عن 200 الف سترليني ويكونوا موجودين في حسابه بمدة لا تقل عن 3 شهور قبل التقديم .. يعني مينفعش تقترضهم من بنك وتروح تقدم بيهم من تاني يوم .. لازم يكونوا موجودين في حسابك من فتره اقلها 3 شهور قبل التقديم
.
الشرط التاني انه يكون عنده خبره سابقه في الاداره ويُستحسن يكون الخبره في نفس مجال الاستثمار اللي هيعمله في ال UK
.
الشرط التالت انه يقدم للحكومه البريطانيه plan كامله عن المشروع اللي هيستثمر فيه ال 200 الف سترليني ايا كان نوع المشروع
.
الشرط الرابع ان المستثمر يعدي من اختبار اللغه سواء ايلتس او تويفل
.
فيزا المستثمر دي بتكون اقامه مؤقته 3 سنين و 4 شهور .. وبيقدر يجيب عائلته واطفاله علي نفس نوع الفيزا وبياخدوا نفس الاقامه المؤقته وبيستفيدوا بنفس الحقوق زي الزوج بالظبط
.
بعد ال 3 سنين لو المشروع تم استثماره حسب ال plan اللي اتقدمت في الاول .. بيقدر يقدم علي تمديد للاقامه لمدة سنتين .. بعد السنتين دول كمان بتقدر تقدم بقي علي الاقامه الدائمه وبعد الاقامه الدائمه ب سنه كامله بتقدر بعدها تقدم للحصول علي الجنسيه البريطانيه ..
.
ملحوظه مهمه جدا .. شراء عقار غير مُعترف بيه كأستثمار في انجلترا ومبتقدرش تاخد عليه فيزا Tier 1 كمستثمر حتي لو اشتريت بيوت لندن كلها
كيفية الحصول علي الجنسيه البريطانيه
.
الجنسيه البريطانيه من اعقد واصعب الجنسيات في العالم .. مفيش حد بيكون بريطاني بين يوم وليله .. ولا من سنه او سنتين اقامه .. الجنسيه البريطانيه بتمر بمراحل كتير جدا وسنين طويله عشان تعرف تاخدها عشان كدة لو انت هدفك من الهجره مجرد الحصول علي جنسيه قويه تانيه .. يبقي مليون في الميه بريطانيا اختيار مش مناسب ..
.
ملحوظه مهمه : بريطانيا لا تمنح الجنسيه بالولادة ابدا الا للي معاهم الجنسيه أو اللي معاهم اقامه دائمه .. يعني مينفعش تروح بفيزا السياحه ومراتك تولد هناك وابنك ياخد الجنسيه ده مستحيل .. كمان مينفعش تكون اقامتك اقامه طالب ومراتك تولد هناك وابنك ياخد الجنسيه دة برضو مستحيل
.
.
مدة الانتظار للحصول علي الجنسيه البريطانيه :
1- لو متجوز من بريطانيه : خمس سنين اقامه مؤقته بعديها اقامه دائمه بعديها تقدم مباشره للحصول علي الجنسيه
2- لو مقيم بعقد عمل : خمس سنين اقامه مؤقته بعديها اقامه دائمه وبعد الاقامه الدائمه تستني سنه كامله وبعد السنه دي تقدم للحصول علي الجنسيه
3- لو مقيم بفيزا طالب عن طريق الدراسه .. بتاخد الاقامه الدائمه بعد 10 سنين كامله من الدراسه
0 تعليقات