كيفية إنشاء موقع احترافي و الربح منه عن طريق الإعلانات

كيفية إنشاء موقع احترافي و الربح منه عن طريق الإعلانات 

كتب

مصطفى زهران

كيف تبدء بموقع جديد موقع احترافي و تربح منه عن طريق الإعلانات وتصل به من زوار عددهم صفر إلى زوار عددهم 50 الف زائر يومياً ..

مبدئياً هتروح على جودادى وهتشوف دومين مناسب ليك بإسم محترم وله معنى ..وركز ع إسم محترم دى.

وبعدين هتجيب سيرفر "إستضافة" vps كويس هتبدء بيه حتى والموقع لسة صغير .. كان مكلفنى 250 جنية فى الشهر .

هتبدء تحدد كلماتك إلى هتشتغل عليها وهتعملها مقالات .. نصيحة لو أنت متجوز شوف مراتك أو أخوك او أختك أو أى حد صاحبك ممكن يساعدك أو شوف حد يشتغل تحت أيدك يكتب معاك عشان يساعدك تحقق الهدف الى أنت ملتزم تعمله .. وصدقنى بتفرق جامد لما يكون أتنين بيكتبو غير لما يكون واحد بس.. بتخلق روح منافسة ومشاركة وبتسهل كتير عليك أنك تعمل حاجة كويسة بجد.

هتروح على مخطط الكلمات الرئيسية لجوجل أدوردز https://goo.gl/FZ4W4d

وهتكتب الكلمة الرئيسية المستهدفة .. وبعدين هتجيب أفكار الكلمات الرئيسية 

بعد كدة هتضغط ع كلمة .. متوسط عمليات البحث الشهرية هيعملك ترتيبك من حيث الأقوي والأكثر بحثا .. أضغط عليها تانى عشان تجيب ترتيبها من حيث الأضعف . هتبدء تاخد كل كلمة وتبحث عنها فى جوجل وهتلاقى تحت عمليات بحث مقترحة من جوجل خد كل واحدة كوبى وشوف البحث عليها قد اية ..ولو لاقيت حاجات البحث عليها 200 : 750 عملية بحث .. هتعملها مقال وتشتغل عليها وهكذا.

وهتبدء تاخد الكلمات دى وتعمل عنها مقالات ..

طيب أنت حالا ضعيف أزاى أختارالكلمات الى أعمل عليها مقالات ويبقى فى أمل اظهر عليها بشكل سريع وأجيب زوار عليها .

دا مثال صغير ..

"كيف اعرف برجي" 135 الف عملية بحث

"كيف اعرف برجي من اسمي فقط" 480 عملية بحث ..

يبقى أنت هتشتغل ع الكلمة الصغيرة وبإذن الله لما تتمكن منها وتبقى صفحة أولى وفى الـ 3 نتايج الأولى تلقائى هتلاقى نفسك ظهرت على الكلمة الكبيرة لكن فى نتيجة متأخرة .. هتحدث المقال وتضيف له محتوي محترم يليق بأنك تستحق الصعود ع الكلمة الكبيرة والى هى "كيف اعرف برجي".

طريقة إعادة الصياغة كاملة .. كيف تكتب مقال حصري

الصفحة الاولى دائما تحتوي على اهم المعلومات التى رائها جوجل واختارها.

ان العشر نتائج هذه هى الأفضل ع الاطلاق .

اذا كنت تكتب مقال عن علاج مرض الكحة ع سبيل المثال .

فسوف تجد من كتب مقال عن علاج الكحة بالاعشاب

واخر كتب علاج الكحة منزليا

واخر كتب عن علاج الكحة للاطفال

واخر تكلم عن اسبابها وانواعها.

يجب الأخذ بالأعتبار ان لك نتيجة من هؤلاء ميزة تميز بها وان جوجل جعل هذه الميزة تؤهلة للظهور فى الصفحة الأولى .

اذا عليك ان تفتح العشر نتائج الاولى واعادة صياغة العشر مقالات فى مقال واحد وباسلوب فريد دون تكرار الكلام معاً لجعله مقال غنى. ولم الشمل والتحدث عن علاج الكحة للاطفال وبالاعشاب وبالطرق المنزلية وجعل مقالك شامل بمعنى الكلمة ويحتوي كل مايخص علاج الكحة . 

نقطة إضافية لم اتكلم عنها من قبل .. فى نهاية كل مقال هتحط رابط ويكيبيديا ووظيفته توضيح لجوجل إن هذا المقال يحتوي على روابط مهمة وموثوقة وفيديو يوتيوب لو أمكن .

هتشترك فى الموقع dlvr.com عشان كل بوست ليك ينزل يروح على الفيس وتويتر وجوجل بلس:

   الموقع دا بتشترك فيه وبتربط برابط الـfeed بتاعك .. وبعد كدة بتعمل 3 حسابات ويفضل باسماء بنات عشان يبقى عليها تفاعل فى فيس وتويتر وجوجل بلس وتربطهم بحسابك ع الموقع دا.. واى مقال بتنشره ع موقعك بينزل تلقائى ع ال3 شبكات ..ومع الوقت بتلاقى ارشفتك حلوة جداً .

كل مقال هتعمل يكون الـURL إنجليزي مش عربى .

هتكتب فى اليوم 5 مقالات يومية .. كل مقال ميقلش عن 1000 كلمة بالاضافة لعمل التاجز بتاعت كل مقال 

من عمليات بحث متعلقة الموجودة فى أسفل نتائج جوجل ..

هتستمر بشكل ثابت لمدة 3 شهور بشكل متواصل.

لازم الـ3 شهور يخلصو يكون فى الموقع 450 مقال شرط أساسى كل مقال 1000 كلمة أو أكتر .

فى الفترة دى هتلاقى كل مقالاتك بتنزل مابين صفحة 3،4،5،6،7،8 ..وطبيعى جداً لأن الموقع لسة ضعيف .

بعد كدة هتجيب دومين منتهى له اثورتى كويس وتتاكد أنه مش متعاقب أو عليه إسبام سكور أعلى من 3 وفى أى مجال وهتحوله ع موقعك .

بعد كدة هتروح ع خمسات وهتشترى بـ100 دولار خدمات باك لينك فى مواقع كبيرة ع كلمات مختلفة ع الأقساااااااام مش المقالات .وكل خدمة تشتريها تكون 3 شهور .

تحافظ على مستواك فى العدد بحيث قبل انتهاء 6 شهور يكون معاك 900 مقال .. 

بعد ما الباك لينك يتحسب ليك .. هتدخل ع جوجل لو محتواك صحة ..أكتب منتدى الصحة وأشترك فى كل المنتديات الموجودة فى جوجل.

وأعمل مقالات كوبى باست وأربط ع لينكات ليك على كلمات أنت بتستهدفها ..

هتشتغل كدة بمعدل 10 لينكات كل يوم ..لمدة شهر

فى المرحلة دى هتلاقى تحسن وتحرك فى نتايج موقعك وهتبدء تلاقى نتايج موقعك بتتقدم وبتقرب من الصفحة الـ 2

بعد مرور 7 شهور عليك .. هتبدء تلاقى تاجز بدون اى تدخل منك انت عملتها قبل كدة .. صعدت وبقت فى نتايج مميزة جداً ..لكن عندك مشكلة وهو ان الزائر بيدخل عليها لكن مش بيلاقى الى هو محتاجة .. 

ودى مرحلة التوليد .. هتولد مقالات انت اتصدرت فيها بدون تعب وجابت لك كلمات جديدة انت متعبتش عليها

كيف تجلب زوار بشكل سريع و بكلمات لم تعمل لها مقالات او حتى باك لينك؟

انا عملت مقال واستهدفت كلمة صحة المراة الحامل ع سبيل المثال ..

كيف أكتب المقال دا؟؟

هتروح ع جوجل وتكتب الكلمة المستهدفة .. وبعد كدة هتنزل تحت خالص وهتلاقى حاجة اسمها

عمليات بحث متعلقة بـ صحة المراة الحامل

صحة الحامل في الاشهر الاولى

صحة الحامل والجنين

المراة الحامل والجماع

صحة الحامل في الشهر السابع

تغذية الحامل في الشهور الاولى

المرأة الحامل في الشهر الرابع

المرأة الحامل في الشهر الأول

تغذية الحامل في الشهر الخامس

هتروح تاخد الكلمات دى وتعمل فقرات داخل المقال وكل عنوان من دول ترويسة 2 .. وتحتها تبدء تكلم عن كل عنوان فى فقرة بقدر الإمكان . وبعد كدة هتعمل الكلمات دى كلها تاجز أو أوسمة .

وبعد كدة هتنشر مقالك هتتفاجىء انك صعدت نتائج أولي فى كلمات التاجز دى ..طيب زى الفل صعدنا وجبنا زوار ..لكن كدة فى مشكلة .. الباونص ريت بتاعك هيكون زبالة الزائر هيدخل ع المقال وممكن ميلاقيش الكلمة الى هو داخل عشانها ويهرب فى ثوانى..طيب عايزين نرضى الزائر دا ويلاقى الى هو عايزة .

هتروح انت يابرنس تعمل مقال بنفس الكلمة بتاعت التاج بالظبط وتعملها تاج لنفس المقال دا بنفس التاج الى بيظهر بيه .. ويوم بالظبط وهتلاقى التاج اختفى ونزل مكانه الموضوع او فضلو الاتنين مع بعض فى نتيجتين تحت بعض ..

مثال : لو صعدت بتاج اسمه صحة الحامل في الشهر السابع فى الحاله دى هتروح انت عامل مقال بنفس الكلمة وتعمل تاج واحد للمقال دا بنفس الكلمة وهى 

"صحة الحامل في الشهر السابع"

هتدخل تعالج التاجز دى وتعملها مقالات بنفس الإسم وتربط المقال بالتاج الى صاعد عشان تحافظ ع معدل الإرتداد بتاعك ..هيترتب على كدة إن التاج هينزل تحته المقال الجديد الى بنفس العنوان أو هيتحذف التاج ويستبدل مكانه المقال الجديد . وفى النهاية أنت الكسبان انك وفرت المعلومة للزائر وبدل ماكن بيدخل ويقفل فى ثانية بقى بيقعد يقرأ المقال وفى احتماله انه يشوف موضوع تاني يعجبه او يضغط ع الإعلان .

بعد كدة هتلاقى أرشفتك إتحسنت بشكل كويس وكل مقال بينزل بعد نشره بكام ساعة تقريباً ..بعد ماكان بياخد يوم ويومين أو أكتر.

هتفضل شغال كدة وبعد مرور 10 شهور عليك .. هتبدء فى خطوة جديدة تصغر عدد كلمات المقال وتزود عدد المقالات .. 

يعنى لو بتكتب 5000 كلمة مقسمين ع 5 مقالات .. لا هتكتبت 10 مقالات كل مقال 500 كلمة .

هتستمر ع كدة شهرين ..هيكون معدلك فى الشهرين دول 600 مقال ماشاء الله.

كدة عدى عليك سنة ولازم توسع الاستضافة وتجدد الدومين وتكون مثلا الضعف ب500 شهريا .

هتلاقى أرشفتك إتحسنت جامد جداً بشكل ملحوظ ، وهيكون مر عليك سنة كاملة . وهتلاقى المقال بينزل وقتى فى جوجل وبيرانك كمان.

فى الوقت دا هتروح تعمل تنصل من الروابط الى إشتريناها من خمسات ..لإن زى ماقولت الباك لينك وظيفته نقول لجوجل أحنا موجودين وخلاص المهمة تمت 

هتبدء تتوسع على كلمات صعبة وكبيرة .. جمد قلبك وأدُخل ع الكلمات الى هى ربع مليون ونص مليون وفى أى مجال قريب منك.

هنيجى بقى لمرحلة الصعود بالأقسام لرفع الموقع فى السماء بإذن الله

أى قسم عايز تصعد بيه إشتغل عليه شهرين مقالات يومياً بعدد كبير فى نفس القسم وهيصعد نتيجة أولى .. وعن تجربة أكتر من مرة وفى مجالات مختلفة الصعوبة.

وأنت شغال .. المقال الى هتلاقية وصل صفحة اولى لكن نتيجة 8 مثلا وواقف مكانه .. أدخل ضيف فيه معلومات جديدة وحدث تاريخ المقال .. وأنشره ع السوشيال ميديا وأديله 2 أو 3 باك لينك بسيط كدة ..وهتلاقيى اتقدم من 2:4 نتائج للامام باذن الله .

ومن اللحظة دى بإذن الله هيكون ربحك الشهري 400 : 600 دولار فى نيتش عربى ..

أنا لم اتكلم عن الأرباح أثناء العمل وأثناء بداية الموقع .. حتى لا أُشغلك به ولتركز فى العمل لكن سيأتى لك أرباح بإذن الله ..أثناء عملك لكن ليست كبيرة.

أهم نصيحة أنصحكم بيها وهى الاستمرارية حتى وأنت عندك أخطاء وعدم معرفة كافية . الاستمرارية هى سر النجاح والله والتجربة خير دليل . مدة عمل سنة ستكون مرهقة لكن بعد كدة هتلاقى المقال الى كنت بتتعب عليه عشان تنزل صفحة 5 ..بقيت بتعمل المقال ينزل صفحة تانية أو أولى كمان..