كيف تسافر الى روسيا لمتابعة كأس العالم - الطيران والتكلفة

كيف تسافر الى روسيا لمتابعة كأس العالم 2018

كتب

اشرف عواد

بالنسبة للحجز و عشان ما نخليش حد يستغلنا ممكن كلنا نفكر مع بعض وتكون الخطوات مع بعض هيكون افضل كتير وارخص كتير

شركات السياحة بدات ترمي شباكها وتحط مبلغ زي ٤٥ الف جنيه و٣٠ الف جنيه والموضوع مش كدة خالص

الاكيد مفيش حجز تذاكر الا عن طريق الفيفا وموقع الفيفا وكمان والاهم نتيجة للتذكرة دي اللي باسمك هيطلع كارت fan id ... ده اهم من التذكرة حاليا لان روسيا والفيفا سمحوا لمواطني الدول اللي صعدت انهم يسافروا اليها بدون تاشيرة فقط ان الفيفا تديك الاي دي نتيجة شرائك التذاكر

يعني اي شركة تشتغلنا وتقولك هتروح ومتقلقش هم انفسهم مش هيقدروا يعملوا ده

ركزوا ع موقع الفيفا وفتح المرحلة التانية من بيع التذاكر مباشرة يوم ١٦ نوفمبر

نجي للنقطة الاهم

الطيران

حاليا هتلاقوا تذاكر طيران ف حدود ال٧٥٠٠ جنيه ع الطيران اليوناني وهتلاقوا الامارتية عاملة ب ٨٠٠٠ والاردني داخل ف الموضوع ب ٧٤٠٠

مصر لطيران عاملة العرض ب ١١ الف للاسف

لازم كلنا نجمع انفسنا مجموعات ومثلا الاردني عامل عرض مجموعات حد يتواصل معاهم ويجيبلنا تذاكر اعتقد ممكن توصل ل٥٠٠٠ او ٦٠٠٠ بالكتير وكذلك نعمل محاولات مع مصر للطيران

انما ف حالة الطيران الروسي رجع شرم والغردقة ممكن الاسعار تنزل

ياريت كل واحد ناوي يروح او دخل بياناته موقع الفيفا يشترك هنا ويقول ونتجمع مع بعض ونحاول نجيب عرض حاليا كايرو موسكو كايرو 

البطولة هبدا يوم ١٤ يونيو قبل عيد الفطر بيوم ومنتخب مصر ممكن يلعب من اول يوم ١٤ الي يوم ١٨ واخر ماتشات المجموعات يوم ٢٨ يونيو يعني اللي يدور ع دييل مع شركة للمجموعة ياريت يفهمهم ان ممكن لو مصر صعدت ناجل رحلة العودة بعد ماتش دور ال١٦ يمكن 

مباريات منتخب مصر في كأس العالم في روسيا 2018

هتتلعب كل خمس ايام وممكن يروح تلات مدن يعني مالوش لزوم تحجز مكان الفترة كلها لانك ممكن تلف كعب داير ورا المنتخب وعشان كدة عاملين كل المواصلات مجانية لحاملي الاي دي فان FAN ID ...

يعني يفضل نحضر الماتش وتاني يوم ع طول ف اتجاه المدينة التانية وتعمل سياحة ف الطريق براحتك الهوستيل شغال

نقطة تانية الفنادق اعتقد غالية يفضل تحجزوا شقق مع بعض 

خلوها سياحة وتشجيع 

 تكلفة السفر الى روسيا لمشاهدة مباريات منتخب مصر في كأس العالم 

١) تكلفة الطيران ذهاب و عودة :: ٦٨٢٦ جنيه مصرى " ٧٠٠٠ جنيه "

٢) تكلفة تذاكر حضور ٣ ماتشات منتخب مصر : ٣٤٠$ ( Category 3 ) ، اى ما يعادل ٦٢٠٠ جنيه مصرى.

٣) تكلفة الأقامة ١٠ ليالى فى فندق نضيف : ٨٠٠٠ جنيه مصرى ..

اما بالنسبة للناس اللى ناعية هم التنقلات بين المدن عشان الماتشات ،، ،، بمجرد انك بتاخد الconfirmation على تذاكر الماتش ،، بتقدم على حاجة اسمها Fan-id ،، و ده مميازاته ::

١) تنقلات مجاناً داخل المدن بالقطارات

٢) تأشيرة مجانية لدخول روسيا..


و كدة حتبقى تكلفة سفرك :: ٧٠٠٠ طيران + ٧٥٠٠ اقامة + ٦٢٠٠ تذاكر الماتش = ٢٠٧٠٠ (( ٢١٠٠٠ جنيه مصر تقريباً))