ليه مؤشر الماوس بيكون مائل علي جنبُه
wikitech
---
وأنتا بتستخدم الكمبيوتر مجاش في بالك تسأل نفسك ليه مؤشر الماوس بيكون مائل علي جنبُه ومش واقف مستقيم كده وصالب طولُه زي المؤشرات أولاد الناس ؟
هوا مش زعلان مننا في حاجة أكيد ولا إحنا علينا ليه فلوس ولا حاجة!
بس الأقاويل كترت في الموضوع ده .. وكل واحد أفتي لُه فتوي وكالعادة وصدعنا بيها
فيه اللي قال إن المؤشر مايل كده علشان يبقي زي شكل الإيد (إيد حضرتك الطاهرة يعني ) لما بتيجي تكتب .. بس فيه ناس بيكتبوا بإيدهم الشمال!
ناس تانيين قالوا إن المؤشر مايل كده علشان يكون مُتماشي مع طريقة القراءة (اللي هيا من الشِمال لليمين) بس برضو فيه لغات غير الأنجليزي بتتقرأ من اليمين للشمال .. زي المنشور اللي بتقرأه دلوقتي ده ماهو باللغة العربية كده!
سيبك من ده وده..
نرجع بالتاريخ كام سنة .. أول واحد أخترع الماوس كان الحاج (Douglas Engelbart) وده لمّا أخترع الماوس كان مصمم المؤشر بتاعها أنه هيكون عمودي مش مايل زي المؤشر اللي قدامك دلوقتي ده! والكلام ده أثبتته وثيقة أتنشرت علي النت سنة 1981 علي موقع (section of Stack Exchange) صورتها في التعليقات
المهم .. الكلام ده كان قبل ما يصمموا واجهة وأيقونات والكلام ده زمن الدوس الجميل فـ شركة (Xerox) كانوا شغالين علي أبحاث لعمل واجهة للكمبيوتر -وقت ما كان الكمبيوتر من غير واجهة ولا أيقونات وزي الدوس كده- فكان المؤشر (العمودي) مش باين كويس علي الشاشة؛ لأن وقتها كانت جودة الشاشة مضروبة بالنار مرتين فالمؤشر الواقف ده مكانش بيبقي واضح كويس وحالته كانت بالبلا خالص
فقالوا طيب نكبَّر المؤشر العمودي ده علشان يبقي واضح ع الشاشة! فلقوا أنه هيبقي لوحده واخد له مساحة كبيرة من الشاشة وشكله مش ولا بُد، فجت لهم فكرة أنهم يخلوا المؤشر مايل بـ 45 درجة (زي الموجود قدام حضرتك ده ) وبالفعل قاموا مميَلينُه 45° ناحية الشِمال .. والسبب اللي خلاهم ميَلوه ع الشمال أنه في الناحية دي هيكون أسهل للمطورين علشان يحسبوا إحداثياتُه في الطول والعرض وخلافه
ومن ساعتها لغاية 2016 أهوه والمؤشر مايل علي جَنبُه ومحدش في أنظمة التشغيل عاجبُه
دي صورة الماوس (اللي كان عامودي) وواقف كده محدش هامه وبسبب رداءة جودة الشاشة مكانش بيبقي واضح كويس 😃
0 تعليقات