دليلك السريع لـ أشهر 8 شماعات شائعة في الوطن العربي

دليلك السريع لـ أشهر 8 شماعات شائعة في الوطن العربي

كتب

Ahmad Abd El-Monsef

الشماعة، دومًا ما كانت الاختيار الأمثل لحياة بائسة وبال مرتاح 

وهنا دليلك السريع لـ أشهر 8 شماعات شائعة في الوطن العربي

1- نظام تعليم فاشل .. اتعب نفسي فيه ليه ؟ 

كلامك صحيح لو عرفت تسافر تتعلم برا متفكرش كتير، ولكن لو معرفتش؟ فاسمحلي ألفت نظرك لنقطة مهمة وهي أن (مناهجنا) ليست بذلك العقم والفشل الذي تتخيله، والدليل أن اختبار عالمي مثل الـ (GRE) - الذي يؤهلك للدراسة في اكبر الجامعات - يكفيك دراسة مناهجنا كي تجتازه بتفوق، ودليل آخر تجده علي لسان دكاترة جامعاتنا اللي سافرت تكمل دراستها في الخارج واللي درّسوا في جامعات برا فلم يجدوا ذلك الفرق الهائل في محتوي المناهج اللي مترسخ في مخيلة الطلبة في العالم العربي، ودليل أخر تجده في محتوي المناهج المعلن عنه في المواقع الرسمية لأكبر جامعات العالم اللي ممكن تطلع عليه بسهولة واللي مش هتجد فيه الفرق الشاسع اللي متخيله، لكنّ الفروق الهائلة في جوانب أخري من منظومة التعليم بعيدًا عن محتوي المنهج.

فبلاش جلد الذات وعقدة الخواجة المتفشية فينا، ونهتم بدراستنا قدر الامكان (على عِلاّتها المتعددة) لأنها - للأسف - من أهم الفرص لسفرنا خارج تلك البقعة الداكنة من العالم وإيجاد ما نحلم بيه من تعليم راقي ومعاملة آدمية وحياة كريمة. 

.

2- التنسيق دخلني كلية مش عايزها | أو حتي لو المناهج كويسة بس مش بفهم من المدرسين أو الدكاترة.

كلاهما هراء فارغ في عصر الانترنت.

العلم اللي شغوف بيه تقدر تدرسه في أكبر جامعات العالم وعلي يد أعظم الأساتذة والدكاترة الجامعيين ببلاش .. و كل الكتب والمراجع والمحاضرات اللي عايزها تقدر تحملها ببلاش بضغة زر .. امال ايه لازمة Coursera و edX و Udacity و Khan Academy و MIT OpenCourseWare و Rwaq رواق و منصة إدراك وغيرهم ؟ 

.

3- معييش لغة تخليني أدرس كويس في المواقع دي ولا اقرأ كتب .

ودي شماعة من قديم الأزل، وتلاقي اللي بيقولها مسيف خمسين ألف بوست عن الانجلش مليانة كورسات ومواقع وكتب وروايات وأفلام وطرق مبتكرة تقوي اللغة عنده في ست شهور .. ولو كنت نزلت زيهم في البوست ده كانوا هيبقوا خمسين ألف وواحد، لكن هو بيضحك علي نفسه وناوي يروح إيفنت جديد بعد يومين للمرة العشرين عشان واحد يقوله الحل السحري لإتقان اللغة في أسبوع ونص.. كفاك هراءًا ! ألم يأنِ لك أن تبدأ ؟؟ لو فعلا عندك أولوية كنت بدأت بكل السبل اللي قدامك (والتزمـت) عشان تلاقي مردود اللي اتعلمته.. غير كده كلام فاضي.

.

4- مفيش شغل غير بواسطة.

شماعة مشهورة ومريحة جدًا هتخليك قاعد ع القهوة بضمير مرتاح خصوصا لما تلاقي أمثلة كتير في حياتك اشتغلت بالواسطة تثبت كلامك (وهتلاقي كتير) .. بس أحب أصدمك أنها أيضًا هراء فارغ في عصر الانترنت

مسمعتش عن الـ Freelancing ؟؟ مسمعتش عن الناس اللي بتكسب آلاف الدولارات في الساعة وهي قاعدة في غرفتها علي جهازها؟؟ كل اللي عملوه انهم قاموا من ع القهوة ودخلوا المواقع اللي فوق دي وغيرها واتعلموا ونموا مهاراتهم وكوّنوا CV محترم وبعدين دخلوا مواقع الفريلانسر وربنا وسع عليهم ورزقهم لما سعوا .

امال ايه لازمة PeoplePerHour و Freelancer و Upwork و Guru.com و Fiverr.com وKhamsat.com و Nabbesh.com و Mostaql.com و غيرهم ؟ 

.

5- المؤامرة الكونية ، ودي أفضل شماعة بتلجأ ليها الحكومات الفاشلة والأنظمة المستبدة .. فـ انعدام الأمن واختفاء العدل وتضليل الإعلام وتدهور الصحة وانتشار الأمراض وتلوث المياة والهواء والغذاء وفشل المنظومة التعليمية وانهيار الاقتصاد ماهي إلا نتاج المؤامرات التي تحاك ضدنا .. اما احنا؟.. احنا فُـلة ، وبنأدي واجبنا علي أكمل وجه، وما أحلاها من تلك الشماعة التي تمنحنا نوما عميقا وراحة بال.

.

6- الحسد، وهي إحدي أهم الشماعات المشهورة في العالم العربي لتبرير أي فشل بكل سهولة ولو فكرت أن تلقي اللوم علي تقصيرهم تجد الرد الساذج بكل بلاهة وجهل (يابني الحسد مذكور في القرآن !!) لأن الفئة دي لا تختلف كثيرًا عن الفئة التي لا تدرك من القرآن إلا أن (الشرع محلل أربعة) مثلهم كمثل الذي قرأ في القرآن (ولا تقربوا الصلاة) ثم أغلقه، فكلهم في الضلال سواء .. يقتبسون من الدين ما يتماشي مع أهوائهم وأيدلوجياتهم فقط .. أولئك الذين اتخذوا إلههم هواهم. 

.

7- معنديش وقت | لما أفضي .. ودي شماعة ساذجة جدًا .. والأفضل استبدالها بجملة ( معنديش أولوية ) فإن وُجدت الأولوية كان الوقت. 

.

8- مش لاقي شغفي ، مش عارف أنا عايز إيه ؟! 

ودي أشهرهم ، بيلجألها الشخص البائس اللي مقتنع أن الناجحين اتولدوا وشغفهم منقوش علي جباههم !.. أو أن الشغف ده بيلاقوه بالفطرة دون أي جهد وبحث ومحاولة وفشل ثم محاولة وفشل إلي أن ينجحوا ، كل اللي عليه انه يقعد في غرفته يندب ، ويروح ايفنت للمرة العشرومية عشان واحد يقوله ( ازاي يلاقي شغفه في خمس دقايق ) شوف ازاي ؟؟!! 

.

الفشل في ذاته ليس عيبـًا يا صديقي ولكن العيب كل العيب في عدم التعلم منه وخلق الشماعات والحُجج والمبررات، فما أسهلها من طريقة لإخماد تأنيب الضمير ومنحك حياة بائسة جميلة. 

.

وأخيرًا أُذكر نفسي قبلك أن الانترنت سلاح ذو حدين ؛ قادر علي أن يمهد لك الطريق لنجاحات مبهرة ، وقادر أيضًا علي أن يجعل منك بائسًا جديدًا منزوٍ في غرفته يهدر عمره فيما لا يسمن ولا يغني من جوع .. فاحذر منه

فكلٌ منّـا سيُسأل عن عمره أمام الله ؛ فجِد لنفسك إجابة الآن فأنت لا تدري متي تلقاه.