كتاب "قوة العادات" - يستحق القراءة مرتين

كتاب "قوة العادات" - يستحق القراءة مرتين

Omar Tarek

بتصحى من النوم الصبح زي كل يوم وتغسل سنانك ..

عمرك فكرت ساعتها ليه بتحط المعجون على الفرشة الأول ، يعني مثلا في يوم صحيت وغسلت سنانك من غير معجون وبعد ما خلصت قمت حاطط المعجون على االفرشة وعاينها ؟!

بكل بساطة لأ، لإن دي عادة .. 

حاجة إنت بتعملها بتلقائية ومش محتاج تفكر أو تركز فيها، خلاص مخك اتعود على كده أو بمعنى أصح الحاجة دي هو مطمنلها ومش محتاج إنه يركز فيها فا بقت بتريحه، وطالما هو مرتاح فا هيفضل يكررها ..

خلاص لبست ونازل رايح الشغل أو الكلية وبتسلك نفس الطريق اللي بتمشيه كل يوم، سألت نفسك في مرة الطريق ده موديك على فين ؟! ..

طاب وانت ماشي في مرة لاقيت الطريق مسدود واضطريت تاخد طريق تاني أول مرة تمشي فيه .. هتلاقي نفسك مركز، ومتوتر، لحد ما توصل للهدف بتاعك وبعد كده مخك يرتاح، وبعد كام تكرار هيبدأ يقارن بين الطريقين ويختار اللي يريحه ويخليه عادة وهكذا ..

العادة دايما بتبقى مبنية على "دليل ومسار روتيني ومكافأة"، ومخنا دايما بيختار اللي يريحه ويديله مكافأة سريعة ..

هناخد الفيس بوك كمثال .. 

"الدليل" هو الموبايل أو اللاب توب 

"المسار الروتيني" إنت هتفتح الموبايل وتفتح الفيس وتبدأ تشوف الأخبار 

"المكافأة" هي النشوة اللي بتحصل عليها لما تعرف حاجة جديدة أو تشوف بوست .. 

وكل ده بيحركه الرغبة .. !! 

مشكلة العادات بقى إنها معقدة جدا، مش في تكوينها، بس في تعدد أشكالها .. البشر عندهم ملايين العادات اللي بتحركهم وممكن لكل عادة يكون في ملايين الأدلة والمسارات والمكافأت ..

عشان كده مفيش ألية ثابته لتغير عادة أو التخلص منها .. الحاجة الوحيدة اللي تقدر تغير بيها عادة هي معرفة تكوينها بدقة وتغييره، بمعنى إن صاحب العادة هو الوحيد القادر على تغيير عاداته لو عرف تكوينها ..

..

في كتاب اسمه "قوة العادات" ويُعتبر من أحسن الكتب اللي قرأتها لحد دلوقتي ..

الكتاب بيشرح ايه هي العادة وتكوينها وأسباب وجودها وكيفية تغييرها عن طريق معرفة تركيبها ..!! 

الحلو في الموضوع إنه مش كتاب تنمية بشرية ومش بيقولك طريقة ثابته أو كلام فارغ أو أي حاجة من دي .. ده كتاب قائم على مجموعة من الأبحاث والاكتشافات اللي اتعملت في مجال علم النفس، وبيسرده في صورة نقاشات وأحداث حصلت، وده بيدي متعة خاصة أثناء قراءته .. 

بجانب إنه مش بيتكلم عن العادات الفردية بس، ده كمان بيتكلم على العادات اللي غيرت مؤسسات كاملة ويستحق قراءة مرتين .. !

تقدروا تحملوا الكتاب من هنا 

http://goo.gl/1haoJh

ودي الريوفوهات بتاعته على Goodreads 

http://goo.gl/LPD8fc

وده فيديو حلو على TED عن العادات 

http://goo.gl/HmwQrj