العلم مفيد حتي لو في دريم بارك

العلم مفيد حتي لو في دريم بارك

كتب 

Mido Ronaldo

تعالي نفترض ان ربنا رزقك ب عمر و مريم .. عمر كبير ما شاء الله عنده 12 سنة مثلا ومريم صغيرة عندها 3 سنين مثلا .. والاتنين شبطوا يوم الجمعة عايزين يروحوا الملاهي 

وحضرتك عشان تخلص من زنهم اضطريت تنصاع لرغبتهم الدنيئة و خدتهم يوم الجمعة و طلعتوا علي دريم بارك مثلا   .. و طلبت معاهم بقي يركبوا المرجيحة اللي قدامك دي .. اهو غلاسة كده و حضرتك وافقت عشان تخلص من زنهم .

هل لازم تحط في اعتبارك شئ معين قبل ما تركبهم المرجيحة دي ولا تركبهم بشكل عشوائي ؟؟؟ 

اها طبعااا .. 

العلم بيقولك لو - مثلا - فاضل بس كرسي جوا و كرسي برا يبقي من الأفضل لمريم انها تركب جوا عشان صغيره و عُمر يركب في الكرسي اللي برا .. 

- هتفرق يعني ؟! 

أها طبعا هتفرق  ... ليه بقي ؟؟ 

لان عمر اما يركب في الكرسي اللي برا هيتحرك بسرعة أكبر من مريم اللي كرسيها جوا !

- يابني متجننيش ما كلهم في مرجيحه واحده و بيلفوا مع بعض اهو مفيش كرسي سبق التاني هيتحرك بسرعة اكبر ازاي بس  

اهدي طيب هفهمك وربنا  

هم فعلا بيدوروا مع بعض في نفس الزمن لكن المسافة اللي بيقطعوها مختلفة .. مترفعش حاجبك 

انت خدت في سنة رابعة ابتدائي تقريبا السرعة بتساوي ايه ؟؟ 

- مسافة علي زمن 

حلو اوي .. طلع الزمن برالموضوع لانهم فعلا بيلفوا مع بعض في نفس الزمن ..اوكيشن ؟؟

خلينا في المسافة (( لو المسافة زادت السرعة كده هتزيد )) اوكيشن اركن دي علي جنب

عمر ومريم دلوقتي المسافة اللي بيقطعوها دي عبارة عن جزء من دايرة ؟؟ . يعني لو رصدت المسافة اللي قطعوها في جزء من اللفة هتلاقيها عباارة عن قوس من الدايرة أو جزء من محيط الدايرة .. صح ؟؟ 

- اها صح 

جميل اوي .. يعني لو عايزين نقيس المسافة اللي هيمشوها في المسار الدائري ده .. معناه اننا عايزين نقيس طول قوس في دايرة .. مظبوط 

- مظبوط 

والقانون يا فندم بيقول ان طول القوس " المسافة " بيساوي 

(( حاصل ضرب زاوية الدوران _في_ نصف قطر المدار اللي بيدوروا فيه )) 

- ها ؟!!!! 

اقفل بوقك  .. زاوية الدوران يعني هما لفوا بزاوية قد ايه ؟؟ .. يعني لو عُمر واقف علي يمينك و مسكته من دراعه و لفيته لحد ما وصل علي شمالك يبقي انت كده لفيته قد ايه ؟؟ 

- اهااا كده لفيته 180 درجه  

الله ينورك عليك كده انت فهمت زاوية الدوران .. و بما انك وانت بتلفه وخليته يمشي في دايره .. 

وأي دايره بيبقي ليها نصف قطر صح ؟؟ اللي هو البُعد بين مركز الدايرة و الجسم اللي بيدور ..

و كذلك عمر ومريم دلوقتي بيتحركوا في مسار دائري و اللي اكيد لكل واحد منهم نصف قطر مختلف صح ؟؟ 

- صح .. انجز عايز تقول ايه ؟!! 

انا قولت خلاص بس انت مخدتش بالك  

نصف القطر بتاع عُمر أكبر من نصف القطر بتاع مريم .. و بما ان الاتنين هيلقوا بنفس زاوية الدوران فدي مش هتأثر .. لكن نصف القطر هيأثر  

**اذن الخلاصة : 

نصف القطر اللي بيدور فيه عمر زاد " بُعده عن مركز المرجيحه اللي هو العمود " >> معني كده ان حاصل ضرب نصف القطر في زاوية الدوران زاد >> يعني المسافة اللي قطعها عمر زادت >> بص علي اول جملة بين قوسين كتبتها و ركناها علي جنب >> يبقي سرعة عمر زااادت 

و علي العكس عند مريم .. بُعدها عن العمود صغير يعني نصف القطر صغير يعني المسافة اللي هتقطعها في نفس الزمن صغيرة معني كده ان سرعتها هتبقي صغيره

يعني لو مدة المرجيحة دقيقة .. الدقيقة دي عمر هيمشي مسافة اكتر من اللي مريم هتمشيها بكتير عشان وانت واقف برا بتتفرج عليهم تبقي فاهم اللي بيحصل .. 

عشان كده الكبار بيحسوا بمتعة أكبر لما يركبوا في الكراسي اللي برا  ... فهمت حاجة ؟؟

- أها فهمت .. فهمت اني مش هودي عيالي دريم بارك تاني انشاالله ما عنهم اتمرجحوا ! 

........