لو بقيت رئيس الجمهورية هتعمل ايه

لو بقيت رئيس الجمهورية هتعمل ايه

كتب

Mido Ronaldo

مش عايز ندب وخلاص .. يعني لو انت بقيت رئيس الجمهورية هتعمل ايه ؟؟ 

1- القانون هيطبق علي الكل وأولهم أنا. 

2- هفتح معبر رفح للابد لاخواتنا الفسلطينين . 

3- هقطع كل علاقتنا بالكيان الصهيوني، هطرد السفير الاسرائيلي ومش هيقي في مصر حاجة اسمها السفارة الاسرائيلية ولا يبقي علمهم بيرفرف علي ارضنا حتي لو فوق عمارة واحدة فقط.. طبعا لما الدولة تقوم اقتصاديا ونبقي في وضع مناسب يخلينا نعيد النظر في الاتفاقيات الدولية.

4- هشكل لجنة من علماء مصر تعيد هيكلة التعليم من جديد من جميع المحاور(مُعلم، مدرسة، منهح)، و ميزانية البحث العلمي هتضاعف الي ما شاء الله.

5- هخرج كل المعتقلين السياسين. 

6- كل الفئات هيتطبق عليها الحد الادني و الاقصي للاجور.

7- هشكل حكومة من شباب الجامعات واكبر واحد فيها لا يتعدي الـ 35 سنة. و هتكون مُلزمة كل شهر تصدر بيان للشعب تعرض فيه ما تم انجازه خلال الشهر عشان يبقي في شفافية و الناس تعرف فلوسها بتروح فين .( مفيش حاجه اسمها نخبي عشان الاشرار ميعرفهوش ).. وهيعاد النظر في ابحاث وافكار واقتراحات الشباب اللي بتتركن في ادراج المكاتب! .

9- جهاز الرقابة علي المصنفات الفنية اللي بيسمح بعرض افلام بتدمر اجيال ده يتشال تمامااا ويتعاد هيكلته من أول وجديد عشان كفايه قرف لحد كده . 

10- زي ما حصل في التعليم هيحصل في الصحة .. هيعاد تأهيل المستشفيات و الدكاترة و المستشفيات الغير آدمية تتقفل تماما حتي تكون قابلة ان بني آدم يتعالجوا فيها . 

11- هشجع الشباب بطرق مختلفة علي استصلاح الاراضي .. عشان كفايه بقي الحُق اللي احنا عايشين فيه ده وسايبين حوالي 96% من مساحة مصر صحرا ! كفايه اعتقد عشان عيب.

12- هرجع الجزيرتين اللي اتباعوا و(أم الرشراش) اللي محدش بيجيب سيرتها و سد النهضة ده هيتشال .. سواء بالسلام أو بالحرب ..

13- لو الحكومة مش هتفتح مصانع جديدة و توفر فرص عمل جديدة للشباب يبقي تتكل علي الله ونجيب حكومة غيرها.

14- اهم حاجة هركز عليها اني اسدد الديون اللي علينا قبل أي حاجة ، وبعد ما نعيد استغلال موارد البلد الطبيعية والبشرية دي صح والصناعة تنشط ونبقي مكتفين ذاتيا، نمنع أي معونة خارجية، لان الامام الشعراوي صدق اما قال( واعلموا أننا لا نستطيع أن تكون كلمتُنا من رأسنا إلا إذا كانت قُوتنا من فأسنا ).

15- سُلطات الدولة التلاتة (التشريعية و التنفيذية و القضائية) هيتفلتروا ويعاد تشكيلهم من جديد، والناس الزباله ملهاش مكان. وسهل يتعرفوا لان الزباله ديما رحيتها بتبقي فايحة !. 

16- هبدأ اهتم بالاماكن الأثرية والسياحية اللي عندنا و اخلي الاعلام و الافلام والمسلسلات تطلع برا جو الحواري و البلطجية و المهرجانات الشعبية و الرقصات والدعارة، ويفرجوا الناس علي جمال البلد دي اللي احنا اصلا مش بنشوفه ولا بنستمتع بيه و بالتالي عايزين الناس برا تشوفه ازاي ؟! والسياحة عندنا تنتعش ازاي؟والدخل القومي يزيد بامارة ايه؟! واحنا بنمحر الاثار؟!!!!

17- مفيش قلم هيتقصف ولا جريدة هتتقفل ولا برنامج ( هزلي ساخر غير حقيقي غير واقعي ) هيتوقف ولا قناة هتتقفل .. لان الدولة اللي تخاف من الانتقاد والسخرية تبقي دولة ضعيفة هشة ! 

البلد دي كانت منارة الشرق الأوسط، ولسه عندها الامكانيات اللي تخليها ترجع لسابق عصرها وأعظم .. وحلول مشاكلنا كلها موجودة .. كل اللي محتاجاه بس شباب - مش عواجيز - يكونوا عايزين يحلوا .. يكون عندهم الارادة انهم يخلوها أحسن.

في حاجات كتير مش متاكد اذا كنت هقدر انفذها ولا بس اللي أنا متأكد منه إن مفيس بلد في العالم هتقوم غير بالكلمتين دول ... العلم و العدل .