"جوفى ترونيكس" وكيل لينوفو فى مصر .. أسوأ خدمة عملاء وصيانة

مهازل "جوفى ترونيكس" وكيل لينوفو فى مصر 

المشكله حصلت مع سلمى اللى تواصلت معانا على رسائل الصفحه من كام يوم و شوفنا اننا لازم ك "ريفيوزات" ننشرها ليكم عشان تاخدوا بالكم كويس جدا من التعامل مع الضمان عموما و مع جوفى ترونيكس بالذات ..

الكلام اللى بعتتهولنا سلمى كان بتاريخ "الخميس 8 مارس" و كان كالأتى بالنص :

" نصيحة. ‫#‏جوفي_ترونيكس‬ أسوأ خدمة عملاء وصيانة.

اشتريت يوم 3/2 موبيل ‪#‎Lenovo_vibe_p1‬ اللي اعلاناته مليانة على كوبري اكتوبر والمحور.

واول ماجبتوا كان عندي واي فاي ومش كنت بكونكت على ال 3G لكن بعد 3 اسابيع الواي فاي فصل وبدأت اكونكت عليه لقيتوا مش شغال افتكرت العيب في شبكة الموبيل كلمت فودافون قالولي لا العيب في بوردت الموبيل . روحت لي #جوفي_ترونيكس

اولا قالولي يدخل صيانة لاني عديت 14 يوم قولت ماشي المهم مش تروح فلوسي على الأرض.

ثانيا: اللي قاعدين في خدمة العملاء لا يفقهوا شيء عن الموبايل وانت بتقولهم المشكله بيكتبوها وراك not verify قولتلهم لية قالوا يعني المشكلة مش ظاهرة قدامهم لما استلموا الموبيل مني قولتها طيب جربي بنفسك علشان تتاكدتي قالتلي لا دة شغل مهندس الصيانة.

ثالثا: لما اخدت الوصل بتاع الصيانة لقيت مكتوب ان الموبيل في خدوش في الشاشة والجهاز نفسه مخدوش قولتلها الجهاز جديد مفيهوش خدش قالتلي دة سيستم مينفعش اغيره.

بيرموا الاجهزة فوق بعض في درج ملوفوف بوصل استلام الموبيل قولتلها طيب خدية بالجراب علشان مش يتخربش في الدرج قالتلي لو سبتية مش هيرجعلك اكيد قولتلها ازاي دة انتوا خدمة عملاء كبيرة قالتلي مش هيرجع انتي حرة.

رابعا: بقى اخدو الموبيل بقالهم 10 ايام كل ما اتكلم يقولولي ما نعرفش عنه حاجة لسة في الصيانة قولتلهم طيب اية مشكلتله بمنتهى قلة الذوق يرد لما تستلمية ابقي اعرفي ماله. "

_________________

دا كان نص الرساله اللى اتبعتلنا .. فطلبنا من سلمى تبعتلنا صورة الايصال اللى اخدته من جوفى ترونيكس .. و لقينا فعلا مكتوب فيه زى ماقات بالضبط ... موضوع ان الجهاز متجرح .. و كمان كاتبين ان المشكله بتاعة الواى فاى مش ظاهره عليه !!

و لما بصينا فى الايصال لقينا ان الضمان غلطان فى اسم الموبايل و كاتب HTC بدل لينوفو !! 

رجعنا و سألنا سلمى عن الموضوع "هما ازاى كاتبين ان نوع الجهاز HTC ؟" 

كان ردها "لما قولتلها قالتلي مش مشكلة"

بصراحه .. مش عارفين نقول ايه .. خدمات ما بعد البيع دى بتكون من اهم الاسباب اللى بتخلى الشركات تستمر فى السوق و بتخلى عملائهم مبسوطين .. بس للاسف .. خدمات ما بعد البيع فى مصر سيئة جدا .. و خصوصا فى الموبايلات .. بيبقى فيه مهازل زى البوست دا