تحليل لاسباب كارثة الامطار في الاسكندرية وأثارها في المستقبل
كتب:
Ahmed Abd El Mowgoud
-----
انا كتبت ستاتس من سنتين عن التغيير المناخي وتآثيره علي مصر
وبعدين المتحدث الرسمي باسم هيئة الارصاد وحيد سعودي طلع في التلفزيون مخصوص عشان يقول ان لا صحة للمنشور علي الفيسبوك وان الشخص - اللي هو انا - غير متخصص وبيقول اي كلام.
خلال السنتين اللي فاتوا رغم انها كانت هواية بحتة .. درست اون لاين .. اساسيات الارصاد والمناخ و قريت كتب كتير عشان مابقاش بتكلم بدون خلفية علمية
دلوقتي الارصاد بيقولوا نفس الكلام اللي انا قلته من سنتين .
عموما مش موضوعنا .. المهم وباختصار .. الوضع هيزداد سوءا والتغيرات المناخية هاتصيب اكتر من ٦ ملايين مواطن مصري بالضرر خلال الكام سنة الجايين .. ناس بتقول خلال ١٠ سنين و ناس بتقول خلال ٢٠ سنة وناس بتقول ٣٠ سنة .. بس الاكيد ان ده هايحصل .
١. احد العلماء في مؤتمر تغيير المناخ العالمي قال بتهكم : "امر مضحك ان المصريين لا يآخذون تعويض عما سوف يلحق بهم من الدول الصناعية الكبرى المتسببة في التغير المناخي اصلا"
٢. اسكندرية المدينة رقم ٤ علي العالم والاولى في البحر المتوسط من حيث خطر التعرض للغرق بسبب ارتفاع مستوى سطح البحر . واللي طبعا
بيرتفع اكتر في الشتا ومع زيادة الامطار
وده لان اسكندرية والدلتا عموما .. هي الدلتا الوحيدة اللي في البحر االمتوسط والمعروف ان اي دلتا بتكون عبارة عن ارض منخفضة اساسا.
٣. يتوقع العلماء ان يزداد منسوب سطح البحر ٣٠ سم بحلول ٢٠٢٥ . ده شئ خلاص اكيد .. مابقاش تكهنات ولا فرضيات علمية .. في مليون model معمولين و حرفيا مئات رسائل الماجستير والدكتوراه علي الموضوع ده.
منهم بحث علمي - رسالة دكتوراه - بتتوقع ان تغرق مدينة الاسكندرية تماما لو ارتفع سطح البحر ٦٠ سم . و غرق نصف المدينة عند ارتفاع سطح البحر ٣٠ سم .. مقارنة بمنسوب سطح البحر سنة ٢٠٠٨.
٤.سطح البحر اصلا في ٢٠١٥ مرتفع ٣ سم عن ٢٠٠٨ .. وده مؤثر علي كفاءة شبكة الصرف ايا كان موقفك السياسي من كفائتها و من كفاءة الدولة ككل .
٥.عند ارتفاع سطح البحر ٣ سم كمان فوق مستواه في ٢٠١٥ .. مش هايبقى في شواطئ اصلا .. يعني كورنيش اسكندرية كله من المعمورة للقلعة هايبقي الرصيف بيبص علي البحر علي طول من غير شاطئ. ..
وده هايخلي العقلية الامنية - وشك في الحيط وقفاك ليا - تبدآ بوضع حواجز امواج خرسانية بطول المدينة في السنين القادمة - زي ماهي عاملة في بعض المناطق .. كحل مؤقت .. وغالبا مش هاينفع.
طبعا اي شوية مطرة بترفع سطح البحر - لحظيا او في موسم الامطار في الشتا - بيظهر الكلام اللي بقوله ده .
٦.حاجة سادسة .. الطبيعة الجغرافية وال contour بتاع مدينة الاسكندرية شبة معلقة الأكل .. يعني الارض عالية من الجنوب و عالية في معظم المناطق علي الكونيش و منخفضة في النص .. وده بيؤدي لتراكم المياه في النص فعلا وصعوبة تسريبها.. زي المعلقة فعلا.
فعموما الامور هتزداد سوءا السنادي والسنين القادمة .. ومش هاتكلم كتير عن اللواءات اللي ماسكين كل الاحياء والحكومة والسياسة والخرا لان مفيش فايدة ..
٧.طبعا في بلاد زي اليابان و هولندا عندهم تقريبا نفس المشاكل دي في بعض المدن الساحلية المنخفضة و حلوها .. اليابان مثلا عملت شبكة تصريف امطار/تسونامي بدآت فيها سنة ١٩٩٢ و انتهت منها ٢٠٠٥ تقريبا (مش متآكد من التواريخ ) .. شبكة عميقة جدا و واسعة جدا يعني قطر اصغر ماسورة حوالي ١٠ متر .. يعني اكبر من نفق عربيات.
٨.واحنا عشان نعمل هنا كده .. لو بدآنا النهارده مش هانخلص قبل ٢٠٢٥ .. وبتكلفة مليارات ،، والا المقابل هايكون نزوح حوالي ٦.٥ مليون مواطن من اسكندرية والدلتا للداخل ... سواء بسبب السيول او بسبب ارتفاع ملوحة الارض بسبب زيادة منسوب البحر و بالتالي تعذر الزراعة في بعض مناطق الدلتا.
٩.ضيف علي هذا .. ظاهرة اسمها El Nino .. وبغض النظر عن تفاصيلها .. فهي ظاهرة عالمية متكررة ودورية وعظيمة فعلا وتستحق المذاكرة والدراسة وكده ..لكن السنادي هاتكون الاقوى من ٦٠ سنة .. ده هايؤدي لان موسم الامطار في دول شرق افريقيا (اثيوبيا - الصومال - رواندا - بروندي - كينيا ) هايكون الاشد والاكبر من ٦٠ سنة ..
١٠.وده يعني ان فيضان النيل هايكون الاكبر من ٦٠ سنة برضه ..
وده يعني ان السد العالي هايضطر يقوم بتصريف مليار متر مكعب يوميا زيادة عن التصريف الطبيعي له .. (وده عادي لا قلق علي السد العالي عشان هو يستطيع التحمل )
وده يعني زيادة منسوب النيل .. ودي حاجة زي اي حاجة في الدنيا .. يمكن استغلالها لصالحنا وممكن تفشخنا .
١١.لكن النينيو هايؤدي السنادي لشوية امطار شبه استوائية علي جنوب مصر .. اسوان والاقصر وقنا والبحر الاحمر .. خصوصا في موسم الفيضان .. يعني محدش يستغرب لما يلاقي في امطار في اسوان في شهر يونيو ٢٠١٦
(تنبؤ مناخي اهوه قبلها ب٨ شهور.. وانا في غنى عنه لو كنت بفتي)
١٢. التغيير المناخي علي مر السنين هايؤدي لانتقال امراض زي الملاريا زي ماقلت من سنتين وحصل في الاقصر السنة اللي فاتت و هايتكرر خصوصا لو حصل امطار في الصيف زي ما العلماء متوقعين .
(و برضه بلاش الردود الغبية بتاعت .. محدش بيقدر يتوقع الطقس اكتر من اسبوعين قدام .. زي ما هيئة الارصاد قالت وردت عليا قبل كده)
١٣.حاجة اخيرة .. اي منطقة جبلية .. بعد ١٥ دقيقة امطار غزيرة .. بيحصل فيها سيول فورا .. اسمها flash floods
المناطق دي هي سينا - العريش - بني سويف - اسوان - الاقصر - العين السخنة - الغردقة - البحر الاحمر بشكل عام - المنيا .
(ودي نفس المناطق المتضررة كل سنة تقريبا )
.... حط بقى كل المعلومات دي علي بعضها .. و افتح التلفزيون اتفرج علي المسئولين وادائهم .. وتخيل احنا رايحين علي فين .
عموما لو المسئولين مش هايتصرفوا في الكوارث دي .. علي الاقل علي الاقل يفصلوا الكهرباء عن المناطق المنكوبة عشان مايتكررش الهبل اللي بيحصل ده والناس تموت متكهربة .. ارواح الناس مش لعبة .
0 تعليقات