وكم من الجرائم ترتكب بأسم الكوميديا

وكم من الجرائم ترتكب بأسم الكوميديا

قناة ام بي سي مصر بتقدم برنامج مسرحيات اسمه مهرجان نجوم الضحك ، في اسبوعين مختلفين شاهدت ما يكون مجموعه تقريبا 30 دقيقة ظهر فيها محمد نجم واحمد بدير وسمير غانم ومظهر ابو النجا واخرون ، كمية الهبوط الي في العمل دة ممكن تدخلك في غيبوبة لمدة طويلة ، جريمة تنكيل بالمشاهدين واضحة وكاملة المعالم ..

مش ممكن مشهد بين احمد بدير ومظهر ابو النجا المفروض انهم اتنين كناسين واحمد بدير خاطب واحدة لمدة 27 سنة وبيحكي لمظهر ابو النجا عنها ، شئ بشع وجريمة نكراء مش ممكن ..

الكوميديا بيتم انتهاكها ، لا افيهات ببتقال ، ولا خفة ظل في الحركات الي بيعملها المتواجدين علي المسرح ، مفيش اي امكانية انك تضحك بأي حال من الأحوال ،، فشل في الارتجال بصورة بشعة ،، اجبار الناس علي الضحك بيبقي نتيجته شئ بشع زي الي بيقدمه البرنامج دة ..

عدم قدرة ناس زي احمد بدير ومظهر ابو النجا وغيرهم من الحضور علي المسرح بصورة قوية ، المسرح الي يقف ويضحك الناس عليه يجب يبقي حد ليه حضور ، الناس دي لو كانت زمان بتقدم الحضور اللازم للتواجد في عرض حي ادام مشاهدين في المسرح ، حاليا فقدت دة تماما واصبح وجودها شئ يدعو للشفقة قولاً واحداً ..

عمل مسرحي لا يحتوي علي كوميديا موقف ، ولا يحتوي علي كوميديا لحظية بأفيه يتقال في اطار الحكاية ولا حتي مواكب لحدث اخر ، امكانية عمل اسقاط كوميدي علي شئ في واقعنا الي بنعيشه مثلا ، فكرة بتتعمل حاجة بتتقدم ، ارتجال يخليك تضحك بالفعل بعفوية ، كل دة مش موجود ..

الفن زي كرة القدم ، اللاعيب لما ميبقاش فورمه استمراره في الملعب بيحرقه اكتر واكتر ، بيجي وقت مبيلاقيش مفر من الأعتزال ، لاعيب الكرة الي بيفهم بيعتزل وهو في قمة عطائه ومقدم لجمهوره شئ عليه القيمه عشان يكون ختامها مسك زي ما بيقولوا ، الي بيعمله مجموعة الفنانين الكبار الي في العمل دة هو كدة بالملي ، ناس فقدت خفة الظل تماما دة لو كانت موجودة يعني حتي زمان في بعض اعمالهم لكنهم حاليا فقدوا القدرة تماما علي اضحاك الناس ..

الرتم ، طريقة الألقاء نفسها واضح فيها تأثرهم ، مفيش تطور ، مفيش مواكبة للزمن ، لما بشوف احمد بدير مثلا وبفتكر دوره في ريا وسكينه تشوف اد اية الاصرار علي اهانة الذات ، كان عندك حضور اختفي تماما اكتفي بأدوار وحاجات تقدم فيها شئ يكون مناسب ليك او حتي مداري في وسط فريق عمل يكون بيقدم شوية شئ يذكر ..

سمير غانم ، يعني انت متهيألي اكبر اسم متواجد في الحاجات الي شوفتها ،، ارحم تاريخك الكوميدي الطويل ، انت راجل فنان كبير وبدون مبالغة ليك علامات فنية الي بيحبك والي مبيحبكش ميقدرش ينكرها ولازم يفتكرها ، اعمالك المسرحية وادوارك في اي عمل فني شاركت فيه من زمان معلمين مع الناس ،، انت اكبر من المشاركة في حاجة زي كدة اكيد ، قبل كدة سمير غانم قال انه ميهموش الفلوس هو عاوز يمثل ، دة حقك قرينا انه بيوافق يطلع في اي عمل فني حتي لو بدون اجر لانه فقط عاوز يقدم اعمال فنيه ويعمل الشئ الي بيحبه ، دة حقك ، بس حقنا كجمهورك نقولك ان الي بيتقدم في البرنامج دة اقل بكتير من حجمك ككوميديان ليه تقله ولية اعمال علامات في تاريخ كوميديا المسرح والدراما التلفزيونية زمان وافلام سينما ..

--

أسطورة الفن الهابط