أنواع التوظيف المختلفة

أنواع التوظيف المختلفة

من سنين كتير أيام أجدادنا مكنش في أنواع كتير للشغل .... يعني كنت تتفرج علي الأفلام القديمة تلاقي الناس نوعين في .... واحد بيكمل تعليمه و يخلص التوجيهية « اللي هي الثانوية العامة» و يدخل الجامعة أو مدرسة الهندسة أو الزراعة و غيرها اللي كانت البديل للكليات حالياً ....و ده كدة بيكون وصل لقمة العلم و تلاقيه «بيتوظف» عن طريق الحكومة في أي وزارة أو مصلحة حكومية و يبقي موظف عند الدولة ... و النوع التاني اللي كان بيوصل لمرحلة معينة من التعليم سواء كانت متقدمة أو لأ و بعدين يتجه لحرفة ورثها عن أهله أو تجارة يباشرها .....هم دول النوعين اللي كانوا متاحين لفترة كبيرة من الزمن ....لكن من التطور و الأنفتاح اللي حصل في مصر في الخمسين ..ستين سنة اللي فاتوا ....لاقينا مصطلحات و أنواع من التوظيف بقت موجودة علي الساحة و بقوة و بقت بتشكل جزء كبير من القوة العاملة في مصر .... وبدأت الوظيفة الثابتة في طريقها للأختفاء ....لكن لسه في ناس مش بتعرف تفرق بين أنواع التوظيف دي .....اللي جاي هو تفريق بسيط بين أنواع التوظيف المختلفة:

1-التعين بدوام كامل Full time:

و ده بيكون غالباً في الهيئات و المصالح و الشركات المملوكة للدولة ...و بيكون الشخص اللي بيشتغل في النظام ملتزم بمواعيد عمل ثابتة 8 ساعات يومياً وليه مرتب ثابت و مواعيد للترقي في شغله و فترة الخدمة بتاعته تنتهي مع سن المعاش و بيكون ليه مكافأة لنهاية الخدمة و معاش من الدولة.

2-دوام جزئي Part Time:

النظام ده بيكون مواعيد عمله محددة بنسبة من الدوام الكامل يعني مثلأ 50% ...80% علي حسب الطلب و ممكن تلاقيه في الوظائف الحكومية في المناصب الكبيرة أو في بعض الأحيان في الأماكن اللي محتاجين فيها ناس بس مش بدوام كامل و بيكون ليه مرتب ثابت برضه و مواعيد ترقي علي حسب الوظيفة.

3-العقد Contract:

و ده أكتر بنلاقيه في الشركات الخاصة و بدأ الأتجاه ده يوجد بكثرة في الحكومة ....و النظام ده قائم علي عقد بين الجهة و الشخص اللي هيتوظف هناك و بيكون لفترة معينة غالباً ما بتكون سنة قابلة للتجديد ....ممكن يكون دوام كامل أو جزئي ....و بيختلف ظروف كل عقد من مكان لمكان تاني علي حسب الحاجة.

4-العمل الحرFreelancer:

المصطلح اللي الظهر مؤخراً في مصر و خاصة بين جيل الشباب مع انه موجود كمعني من زمان زي أصحاب الحرف اللي اتكلمنا عنهم فوق .....و الفريلانسر هو واحد لا علاقة له بالشركة أو الهيئة اللي بيشتغل معاها هو مجرد واحد بيقدم خدمة لفترة معينة و بهدف معين لشركة و بياخد المقابل علي حسب الأتفاق المسبق بينهم .

كل واحد فينا في نظام من دول مناسب ليه و لمهاراته و لصفاته ....لازم قبل ما تدور عن وظيفة أو مجال تشتغل فيه تعرف الأول النظام اللي هتشتغل بيه و هل هو مناسب ليك ولا لأ ؟