احذر من شركة جو باص السيئة جداً جداً

احذر من شركة جو باص السيئة جداً جداً

هحكي تجربتي باختصار مع شركة جو باص السيئة جداً جداً جداً

أنا جربت جو بص 4 مرات و كنت كلها رحلات للجونة

مرتين السنة دي و مرتين السنة إلي فاتت

سمعت انها شركة نضيفة أوي و أحسن من السوبر جيت فقلت نجرب

بس الواقع مكنش كدة إطلاقاً

أولاً :

وصف الاوتوبيسات على الموقع ملوش علاقة بالواقع

مفيش wifi في ولا اوتوبيس من الفئات العالية زي مبيقولو

و إنت و حظك ممكن يبقى الاوتوبيس فيه شاشة عالكرسي و ممكن لأ

و انسى موضوع الكراسي الواسعة ده

هما كام كرسي كدة قدام في فئات الاليت إلي ينطبق عليهم موضوع الكرسي المريح لكن باقي الكراسي إلي ورا تجيب إنزلاق غضروفي

ثانياً :

سعر الأوتوتبيس ملوش دعوة بكمية الخدمات و وسائل الترفيه إلي فالاوتوبيس

عندك من 65 جنيه ل-95 جنيه اوتوبيسات زبالة بتعطل رحلة اه و رحلة لأ

والغريب إن الناس بتتعرض لمواقف كدة و تركب تاني عادي قالك stockholm سيندروم

أنا اضطريت اركب اوتوبيس 95 إلي هو اسمه first class عشان كان لزم اتحرك فالمعاد بتاعه ! عطل بينا في نص الطريق،

معانا أطفال و عواجيز و منتهى البهدلة،

السواق وقف عل طريق مش عارف يعمل حاجة .. واحد مقطورة وقفلنا وقعد يحاول يصلح المشكلة .. الشركة مبعتتش حد تشوف البني أدمين إلي واقفين عل طريق دول! .. بالصدفة أتوبيس من أبو 120 جنيه كان جي ورانا، وئف و ركب معه شوية ركاب من الاوتوبيس العطلان منهم احنا .. والباقي الله أعلم عملو اه!

ثالثاً :

بدون إستثناء في كل المرات إلي ركبت فيها مع جو باص، السواقين مجانين رسمي .. هما مش مدركين حجم الاوتوبيس إلي هما سايقينه ولا مدركين إن معاهم ناس ممكن تموت أو تتعور لو الاوتوبيس عمل حادثة، عايشين لوحدهم في فقاعة قدام الدركسيون بيلعبو need for speed في طريق الزعفرانة!

رابعاً :

و دي حاجة مش مهمة بس هسيح بالمرة

الوجبات إلي بيقولو عليها، إلي بتغلي تمن الاوتوبيس

عبارة عن باتيه أو شئ شبيه المولتو بس نوع مجهول و عصير فرجلو إلي هو أردأ أنواع العصير فيكي يامصر

و شاي فتلة مرمي كده بيديلك فتلاية في ايدك كدة مكشوفة

أيولاهي زي مبقول كدة ..

خامساً :

و دي حاجة مهمة لازم أتكلم عليها !

... الحمامات!

ياديني !!

يعني متوقع من أسرة معها طفل أو طفلين في رحلة 5 أو 6 ساعات متواصلة متحتجش الحمام؟

أكيد لأ

الحمامات يا معلم محدش بيقربلها

محدش نضفها من ساعة ما خرجو الاوتوبيس مل مصنع .. أراهن بعلبة عصير فرجلو كاملة

ليه كدة طيب؟

ذنبها إيه الناس إلي قاعدة في وش الحمام كل مل باب يتفتح يتعمل فيهم كدة؟

بصو بقى، هتقولي كل وسائل المواصلات كدة و مفيش أنضف من كدة هقولك معلش ماتجيش شركة تتنطط علينا

و تغلي أسعار الاوتوبيسات بمنظر ده و تدفع في app و في website و إعلانات راديو بالهبل،،

و مش عارفين يعملو صيانة عدلة للاوتوبيسات و ينضفو الحمامات

بلاش أرف بقى و قدمو خدمة عدلة زي مابتقولو

كفاية بهدلة في ناس محترمة كل ذنبهم انهم صدقو انكو شركة نضيفة