الأوروجواي تسمح رسمياً بزراعة و بيع و إستهلاك الحشيش

الأوروجواي تسمح رسمياً بزراعة و بيع و إستهلاك الحشيش

صدق أو لا تصدق و بجد اللي يسافر ياما يشوف... دولة الأوروجواي في أمريكا الجنوبية غيرت قوانينها السنة إللي فاتت عشان تسمح رسمياً بزراعة و بيع و إستهلاك الحشيش اللي يعتبر علاج قانوني مسموح إنه يتباع عادي في الصيدليات و المستشفيات في جميع أرجاء الأوروجواي عشان بيخفف آلام مرضي الصرع و السرطان و الصداع النصفي و أمراض كتيرة تانية!!

الأوروجواي بعد القانون ده بقت أول دولة في العالم تسمح بالحشيش للعلاج الروحاني و طلع رئيس الجمهورية بتاعهم بعد تصديقه علي القرار يقول إنه مقتنع و واثق تماماً إن مستقبل البلاد و الشعب حيبقي أحسن و أفضل بكتير في كل المجالات و كمان خلي الحكومة الأوروجوانية هي المسؤول الوحيد عن الحشيش عشان يقضي و يكافح جشع تجار المخدرات و السود السودة،

و عشان الرئيس يبين للشعب إن الموضوع ده مش هزار طلع في أول لقاء صحفي بعد ما صدر القانون و خلي المذيع اللي بيستضيفه يشرب سيجارة حشيش علي الهواء و هو بيسأله الأسئلة !!

القانون ده بيسمح بحاجات كتير منها:

١-كل مواطن عايز يستفيد بالقانون ده لازم يسجل بياناته في أقرب قسم شرطة أو مكتب بريد أو مكتب تابع لوزارة الصحة عشان يضمن نصيبه من الحشيش و عشان الحكومة تعرف تحدد كمية الحشيش اللي لازم تزرعوا سنوياً عشان كل المواطنين

٢-لكل مواطن الحق في إنه ياخد و يستهلك ١٠ جرام حشيش في الإسبوع ، يعني ليه في ذمة الحكومة ٤٠ جرام في الشهر

٣-لكل مواطن الحق في زراعة الحشيش في جنينة أو سطوح أو بلكونة بيته بشرط إنه يكون للإستخدام الشخصي و العائلي بس و مش للتجارة.

٤-لكل مواطن الحق إنه يشرب حشيش في أي مكان في البلد و في أي وقت إلا الأماكن الممنوع فيها التدخين

٥-الحكومة الأوروجوانية هي اللي بتحدد سعر الحشيش و سعره دلوقتي أقل من دولار أمريكي (٧،٥ جنيه مصري) للجرام

٦-يسمح لبعض المواطنين صرف كمية أكبر من الحشيش فقط لو عيانين و الدكاترة بتاعتهم كتبوا في الروشتة إنهم محتاجين كميات مضاعفة من الحشيش عشان حالتهم تتحسن.

٧-الحكومة الأوروجوانية أعلنت إنها حتزرع أراضي واسعة بالحشيش عشان تقدر تنتج حوالي ٢٥ طن حشيش سنوياً عشان يكفي شعب الأوروجواي كله اللي هو ٣،٣ مليون مواطن

الأغرب من ده كله إن بعد سنة من بداية القانون ده طلع المسؤولين في الحكومة يقولوا إن النجاحات العظيمة اللي الرئيس قال عليها حتحصل بعد تنفيذ القانون حصلت بجد و من أهمها إن:

الشعب الأوروجواني بقي شعب أسعد بكتير من قبل كدة و الناس بقت علي طول مبتسمة و نسبة الصداع و الإكتئاب و العنف و الجريمة بقت أقل،

و كمان معدلات السياحة إرتفعت بطريقة كبيرة جداً للأوروجواي و عدد السياح زاد أضعاف و ده بفضل أسعار الحشيش إنها أقل ١٠ مرات من تمن الحشيش في أمريكا و أوروبا و أقل ٢٠ مرة من تمن الحشيش في اليابان، 

و كل السياح جايين بيقولوا إنهم عندهم إكتئاب أو صداع شديد و عايزين يخفوا smile emoticon

إيه رأيكم في اللي بيحصل للعالم اليومين دول ، الناس لسعت و خرفت خالص يا عيني ، أهي دي حاجة من أغرب الحاجات اللي حجاجوفيتش شافها في رحلته ل١١٥دولة في كل أنحاء العالم، 

حد شاف حاجة أغرب و أعجب من كدة ؟؟!

*ملحوظة: الصورة لحجاجوفيتش و أحد السياح و شرطية من قوات الشرطة الأوروجوانية المسؤولة عن متابعة و سؤال المواطنين لو معاهم أي كمية من الحشيش أكتر من المسموح بيها

و لو مسكوا حد معاه كمية كبيرة بيدفعوه غرامة ما بين ٢ دولار لحد أقصي ٨٧ دولار أمريكي ، هي دي العقوبة !!

Ahmed Haggagovic - أحمد حجاجوفيتش