للمبتدئين: إزاي تكسب من أدسنس

كتب

Ashraf Al Shafaki

لاحظت إن للأسف كتير من المبتدئين بيكونوا متخبطين وبيعانوا كتير وبيمشوا في سكك وما يكسبوش برضو، وأعتقد إن سبب ده هو الأفكار الخاطئة اللي بيتم تصديرها ليهم من خلال فيديوهات كيف تكسب من النت!

المبتديء من دول يا ولداه بيحاول يتبع الخطوات ويعمل التالي:

١- اشتري دومين (رخيص)

٢- اعمل هوستنج (أرخص استضافة)

٣- ركب ووردبريس

٤- اختار قالب حلو

٥- وأهم حاجة بقى: عبي يا معلم مقالات على قد ما تقدر ٣٠٠ كلمة وإحشيها كيوردز

٦- قدم في أدسينس واستنى لحاد ما تفرج

الأغلبية بتمشي عالخطوات دي وبعدين تيجي تولول وتقع في مصيبة من دول:

١- الأدسينس مش راضي يقبلني (بكاء وعويل)

٢- النقرات رخيصة جدا!

٣- مافيش زيارات للموقع!

٤- الربح قليل أوييي

مشكلة الناس دي إنها مش فاهمة فلسفة الأدسينس ولا الربح من النت، الفكرة مش سبوبة بترميها وتطلعلك ألافات بدون تعب، لو الموضوع سهل كدة كان كل الناس عملته وبقت غنية أو كل الناس عملته فأصبح رخيص ومش بيكسب. طب أمال إيه الفلسفة mindset اللي أدخل بيها المجال ده علشان أكسب فيه فعلا زي اللي كسبوا قبلي؟

---------------------------------------------

خليني أحكيلكم الموضوع في شكل قصة علشان يتفهم بسهولة:

أحمد طالب في كلية تجارة جامعة قناة السويس، بيحب ركوب العجل من صغره وشارك في سباقات العجل من وهو في إعدادي وحاليا بيسابق على مستوى الجمهورية.

أحمد من كتر عشقة للعجل وركوبه ليه وشراؤه لعجلة ورا التانية بقى يعرف يصلح العجل ويفهم في قطع غياره ويعرف إزاي يدرب نفسه ويهتم بأكله ويوفق ما بين هوايته ومذاكرته.

أحمد قرر يعمل مدونة عن العجل فراح عمل مدونة مجانية على بلوجر وكل كام يوم كان بينزل صوره وصور العجل ويكتب عن تجربته في سباقات العجل وشراء العجل وقطع غيار العجل وصيانة العجل.

بعد مرور شهور ابتدت ناس أكتر تعرف عن مدونة أحمد الخاصة بالعجل وبدئت بعض المواقع الإخبارية كمان زي المصري اليوم واليوم السابع تتكلم عن أحمد وتحط باكلينك للمدونة بتاعته.

بعد مرور ٦ شهور عدد الزوار لمدونة أحمد زاد بشكل ملحوظ فأحمد تحمس واشترك في برنامج أدسينس بعد ما واحد صاحبه نصحه بكدة.

أحمد لقى إن في بعض الأرباح البسيطة ابتدت تجيله من المدونة بتاعته بعد ما اتقبل في برنامج أدسينس لكن الموضوع أخد ٣ شهور كمان علشان يلم أول ميت دولار، وبرغم كدة أحمد كان فرحان بيهم جدا لإنهم أول مكسب حقيقي ليه من خلال البلوج بتاعه.

أحمد تحمس واشتغل أكتر على المدونة بتاعته وبدأ يتعلم أكتر عن الأدسينس والسيو وكتابة المحتوى ويدرس مدونات مشهورة أجنبية في نفس مجاله. أحمد بدأ تظبيط أماكن الإعلانات في المدونة واشترى دومين خاص بيه وركز في الكيوردز المهمة والباكلينكس وبدأ يكتب مقالات أطول وأعمق وأفيد. ولإن أحمد عنده خبرة طويلة في العجل فكانت مقالاته بتنافس بشراسة أي محتوى في نفس المجال بتاعه.

بعد مرور سنة ونص أحمد بقى متوسط دخله الشهري من المدونة وصل ل ٥٠٠ دولار، يمكن مش المبلغ الفظيع لكنه مبسوط بيه لإنه بيعمل حاجة بيحبها وبيفيد الناس وبيجيله دخل شبه ثابت من غير مجهود فظيع حاليا.

القصة خلصت.

طبعا دي قصة تخيلية بحتة بس الهدف منها إن نبين فلسفة الأدسينس وحقيقته. لو عايز تصعد بسرعة فتأكد إنك هتقع بسرعة ده لو عرفت تصعد أصلا يعني.

أرجو إني أكون نجحت في بيان روح الأدسينس للمبتدئين، طبعا الخطوات المذكورة في القصة مش هي الطريقة الوحيدة لكن ده مجرد مثال توضيحي لبيان أحد السيناريوهات المشهورة والناجحة في الكسب بشكل مستمر من أدسينس أو أفيليت أو غيره.